Dømd til samfunnsstraff for tjuveri av medisinar

Den tidlegare kommunalt tilsette møtte i Hordaland tingrett i midten av august. Tiltalen galdt grovt tjuveri, ulovleg oppbevaring av narkotika og dokumentforfalsking. I retten sa kvinna seg delvis skuldig i det ho var tiltala for. Etter ei korrigering av tiltalen der aktor strauk at det var stole 100 tablettar Vival, erkjende ho straffskuld på alle punkt. Det kjem fram i domen frå tingretten.

Domen enda med samfunnsstraff i 73 timar som må gjennomførast innan fem månader. Retten gav kvinna eit frådrag på to timar for tida ho sat i varetekt.

I domen har retten lagt vekt på både omfanget og at stelinga har gått føre seg over lang tid. Når det gjeld formildande omstende, vert det trekt fram at kvinna erkjende straffskuld etter den endra tiltaleavgjerda frå den dagen ransakinga vart gjennomført og ho vart arrestert.

Kvinna har forklart seg fyldig både til politiet og i retten, og det har dessutan vore lang sakshandsaming. Vedkomande har ifylgje domen vist evne og vilje til å koma seg ut av misbruket.

Domen er ikkje rettskraftig enno.

– Illustrerer lite respekt

Retten fann det bevist utover rimeleg og fornuftig tvil at kvinna over tid har stole store mengder narkotiske tablettar med stadig nye metodar for å skaffa seg tilgang. Metodane har utvikla seg etter kvart som tilgangen har vorte vanskelegare.

– Det illustrerer at ho ikkje hadde respekt for arbeidsplassen, kollegaene eller det strenge regelverket som gjeld for uttak av denne typen medikament, seier tingretten i domen.

Forsvararen til kvinna, advokat Dan Stian Femoen, viste i retten til ny høgsterettspraksis knytt til rusavhengige sin omgang med narkotika til eige bruk, og la ned påstand om at kvinna ikkje skulle straffast for å ha oppbevart narkotika.

Ifylgje domen vurderer retten praksisen til fyrst og fremst å vera retta mot mindre mengder narkotika. Retten er ikkje i tvil om at tablettane var tenkte til eige bruk, men meiner at omfanget er større enn i dei tilfella som Høgsterett har valt å reagera på.

– Smertelindrande

I retten forklarte kvinna at ein operasjon for nokre år sidan medførte store smerter. Ho fekk difor tilgang til OxyContin som smertelindring. Tablettane viste seg å vera svært avhengigheitsskapande.

Det gjekk ikkje lang tid før kvinna var tilbake i arbeid i helse- og omsorgstenesta. Gjennom stillinga hadde ho ikkje tilgang til medisinrommet på institusjonen, men ho var der saman med sjukepleiarar og fekk såleis kunnskap om kvar nøkkelen var. Sidan tileigna ho seg nøkkelen, låste seg inn og tok medisin frå destruksjonskassen, ifylgje domen.

Kvinna forklarte i retten at ho ved fleire høve hadde «raska med seg» det ho klarte og i ettertid brukt det ho hadde behov for sjølv. Resten vart lagra i heimen hennar.

Vart flytta, men heldt fram

På eit tidspunkt vart den tilsette teken for å ha tileigna seg kvalmestillande tablettar frå ein bebuar der ho arbeidde. Hendinga utløyste ei åtvaring frå arbeidsgjevar og omplassering til ein annan institusjon.

Ein var nøydd til å ha ein eigen kode for å koma seg inn på medisinrommet på den nye arbeidsplassen. Koden vart endra no og då, og ny kode vart send til sjukepleiarane som hadde tilgang til rommet. For å få tak i kodane, forklarte kvinna at ho gjekk inn på datamaskina etter at sjukepleiarane hadde brukt henne, i håp om at dei ikkje hadde logga ut. Om det ikkje var gjort, kunne kvinna gå inn i meldingane og finna dåverande kode. Dette lukkast ho med fleire gonger, ifylgje domen.

Seinare vart det innført bruk av kode kombinert med personleg tilgangskort. Kvinna forklarte at ho ved minst tre tilfelle hadde tileigna seg kortet og koden til ein kollega. Koden hadde kvinna hugsa då ho såg at kollegaen gjekk inn på arbeidsplassen.

– Oppdaga svinn

Rutinen i medisinrommet var å føra uttak av såkalla A- og B-preparat på eit skjema for narkotikakontroll. For ikkje å verta oppdaga, kopierte kvinna arket for det aktuelle preparatet og endra lagerstatusen. Slik vart det korrekt etter at kvinna hadde teke ut det ho ville. For å få det til, måtte ho forfalska signaturen til leiarane.

Svinn i medisinrommet vart oppdaga hausten 2020. Fyrst trudde leiinga at det skuldast ein menneskeleg svikt eller at nokon hadde vore unøyaktige, men det viste seg ikkje å stemma. Frå hausten og fram til våren vart det gjennomført kontrollar i medisinrommet tre gongar i døgeret. På bakgrunn av det vart mistanken retta mot kvinna.

Ei som har vore leiar for kvinna, og som vitna i rettssaka, fortalde at ho i januar 2021 sjølv oppdaga at signaturen hennar var forfalska på oversikta over preparat.

Våren 2021 vart det gjennomført ei ransaking hjå den tilsette. Det vart det funne store mengder tablettar og mykje tom emballasje. Misbruket var ukjent for alle.