Dømd til samfunnsstraff for innbrot
Ein mann frå Kvam er dømd til samfunnsstraff i 120 timar etter innbrot og skadeverk i Norheimsund i vinter og vår.
Mannen lyt òg tola inndraging av 2.400 kroner og to kamerastativ. Det kjem fram i ein dom frå Hordaland tingrett.
Tiltalen gjekk ut på innbrot og skadeverk hjå tre verksemder og tjuveri hjå ei av verksemdene. Mannen sa seg delvis skuldig etter tiltalen.
Aktor la ned påstand om samfunnsstraff i 150 timar, 15.000 kroner i erstatning til éi av verksemdene og inndraging av 2.400 kroner og to kamerastativ. Forsvararen la ned påstand om frifinning, subsidiært at mannen måtte bli vurdert på mildaste måte.
Overvaking viste setlar
Den fyrste hendinga fann stad hjå Boots Apotek i februar. Ifylgje domen har ikkje mannen noko minne om hendinga, men han erkjenner straffskuld etter å ha sett seg sjølv på video frå overvakingskamera. Også to DNA-prøvar gav utslag.
I retten erkjende mannen også straffskuld for eitt av innbrota og skadeverket i vår. Han forklara at han hjå Express Foto Digital AS hadde mål om å finna pengar, men at han ikkje fann det og i sinne tok med seg to kamerastativ.
Ein video frå eit overvakingskamera viser at mannen opnar kassen og tek ut det som ifylgje domen ser ut som setlar. I videoen hamnar nokre setlar på golvet, og mannen plukkar dei opp og puttar dei i lomma. Videoen viser òg at han tek med kamerastativa.
Under ei ransaking hjå mannen same dagen fann politiet 2.400 kroner i lomma på ei bukse lik den han hadde på overvakingsvideoen. Han opplyste då at pengane var tekne ut av eigen konto, men nettbanken viste ingen uttak som stemte med summen. Retten fann det såleis bevist at han stal pengane.
– Har teke tak
Mannen erkjende ikkje straffskuld for innbrot og skadeverk hjå Kvam Veterinærkontor. Ifylgje domen forklara mannen at han den aktuelle natta pussa opp og gjorde leilegheita klar for sal. Då politiet var innom han ei tid etter innbrotet, nekta han for å ha hatt noko med det å gjera. Politiet oppfatta mannen som samarbeidsvillig og hyggjeleg, og ikkje rusa.
Eit stillbilete frå overvakingskamera og kle funne hjå mannen same natta vart samanlikna, men retten er i tvil om kleda kan knytast til ugjerninga. Mannen vart såleis frikjend for den tiltaleposten.
I skjerpande retning har retten lagt vekt på at mannen er dømd for liknande forhold tidlegare. At han erkjende straffskuld på fleire punkt, vart vektlagt i formildande retning. Mannen har òg teke tak i livet sitt og er i ein betre situasjon no enn i vinter og vår, ifylgje domen.
