Dømd på nytt i lagmannsretten

Då mannen møtte i tingretten i vår, erkjende han å ha lasta ned store mengder overgrepsmateriale i form av både bilete og video. Han nekta for å ha delt materialet. Retten meinte at kvemmingen hadde vist «eit fast forbrytersk forsett» og vist korkje vilje eller evne til å stoppa. Domen enda med fengsel i to år og to månader.

Domen vart anka. Anken galdt provvurderinga og straffutmålinga. Forsvarar Thomas Nikolai Skeie Nondal meiner mellom anna at det ikkje er dekning for å leggja til grunn den mengda overgrepsmateriale som tingretten gjorde.

Ankeforhandlinga vart halden i Gulating lagmannsrett i slutten av august. Politioverbetjent Anne-Siri Tysseland ved Kvam politistasjon forklara seg om etterforskinga, og sa at det var gjort funn av 60.153 unike bilete eller filmar ved den fyrste ransakinga. Ved ransaking nummer to vart det gjort funn av 11.317 unike bilete eller filmar. Heile materialet ikkje er gjennomgått, opplyste Tysseland.

Den domfelte forklara at han ikkje veit kor stor mengda har vore, men meiner det må ha vore mange duplikat, då han har hatt kopiar lagra på ulike einingar. Når det gjeld funna under ransaking nummer to, påpeika forsvararen at det i tiltalevedtaket vart oppgjeve at det vart funne 3.919, ikkje 11.317 unike filer.

I domen står det at det for lagmannsretten er uklart korleis talet har vorte til 11.317. All rimeleg tvil skal koma den tiltala til gode, og lagmannsretten valde såleis å leggja til grunn at talet på unike bilete eller filmar er 60.153 pluss 3.919, til saman 64.072.

Forsvararen hevda at det ikkje er grunnlag for å vurdera materialet som grovt, då ikkje alt er gjennomgått. Ulike bilete og filmar vart viste til lagmannsretten, som kom fram til at det ikkje er tvilsamt, og heller ikkje omstridt, at det i materialet finst innhald som klart må reknast som grovt.

Lagmannsretten dømde mannen til fengsel i to år. Det er to månader kortare enn domen frå tingretten.