Dømd for ulovleg køyring

Det kjem fram i ein dom frå Hordaland tingrett. Mannen var tiltala for to gonger å ha køyrt utan gyldig førarkort i ein bil med bruksforbod. Køyringa gjekk føre seg i sommar, med åtte dagars mellomrom. Bilen vart stoppa på Kvamskogen og i Norheimsund.

Rettssaka fann stad i byrjinga av november. Mannen erkjende straffskuld for tilfellet på Kvamskogen. Han sa i forklaringa at han var klar over at han ikkje hadde gyldig førarkort og at det var forbode å bruka bilen.

Episoden i Norheimsund erkjende han ikkje straffskuld for. Han forklara at han var på besøk hjå familie, og at to kameratar av han lånte bilen, sjølv om dei var åtvara om at bilen hadde bruksforbod.

Ein politibetjent vitna i saka. Vedkomande forklara at han den aktuelle dagen skulle levera tenestebilen i Kvam, og ikkje var i teneste. Undervegs vart han merksam på bilen til mannen, som køyrde parallelt på ein sideveg. Bilen bremsa, og betjenten senka farten for å sjå kva som skjedde.

Vitnet forklara at han kunne sjå at det var den no dømde mannen som køyrde — fyrst frå sida, så rett på ansiktet. På bakgrunn av hendinga melde vitnet mannen til politiet.

Då den same politibetjenten stoppa mannen åtte dagar seinare, sa han at han fleire gonger hadde prøvd å nå vedkomande for eit avhøyr. Mannen skal ha sagt at han hugsa meldinga, men nekta i retten for å ha sagt at han hugsa sjølve hendinga.

Retten festa ikkje lit til forklaringa.

Aktor la ned påstand om fengsel i 21 dagar med ei prøvetid på to år, og å betala 19.500 kroner i bot. Forsvararen la ned påstand om frifinning, subsidiært at tiltalte vart vurdert på mildaste måte.

Mannen vart dømd til 21 dagar i fengsel, to års prøvetid og ei bot på 19.500 kroner. Domen er rettskraftig.