Dømd for ruskøyring

Det kjem fram i ein dom frå Hordaland tingrett.

Mannen tilstod utan atterhald då han møtte i retten i midten av august. Hendinga fann stad i mars. Den dømde, som hadde drukke alkohol, køyrde frå Øystese til Norheimsund på natta. Då han parkerte, ringde han sjølv til politiet og erkjende kva han hadde gjort.

Ein blodprøve som vart teken nær tre timar etter køyringa, viste ein alkoholpromille på 1,06.

I tillegg til fengsel og bot er mannen frådømd retten til å køyra førarkortpliktig motorvogn i 21 månader, og må ta førarkortet på nytt om han vil bak rattet att.

Retten vektla i formildande retning at mannen tilstod. I skjerpande retning vektla retten at mannen, sjølv om han visste godt kva han gjorde, køyrde i heile seks kilometer før han stoppa.