Dømd for Nav-svindel

Kvemmingen møtte i Hordaland tingrett i midten av februar, der han vart dømd til fengsel utan vilkår i 50 dagar. Ifylgje domen leverte han elektroniske meldekort til Nav med urette opplysningar over ein periode på 19 månader.

Domen er ikkje rettskraftig.

Frå koronaen lamma Noreg i mars til midten av juli 2020 opplyste mannen i 40-åra, som er tilsett hjå fleire arbeidsgjevarar, å ha jobba 0 timar. Etter eit varsel frå Nav i august same året korrigerte han meldekorta.

Til saman i perioden mars 2020 til oktober året etter opplyste vedkomande at han hadde jobba totalt 1.141 timar. Eigentleg jobba han 1.874,5 timar. Det urette timetalet, som er grunnlaget for automatisk utrekning, førte til at kvemmingen fekk utbetalt 328.594 kroner for mykje i stønad.

Ifylgje domen gjorde mannen greie for dei faktiske forholda og erkjende straffskuld for å ha vore grovt aktlaus ved ikkje å oppgje alle timane han hadde arbeidd. Han opplyste i tingretten at han gløymde å føra opp timane han hadde jobba hjå den eine arbeidsgjevaren, som utgjorde ei stilling på 20 prosent.

Normal reaksjon for eit grovt aktlaust Nav-bedrageri i denne storleiken er 75 dagar i fengsel utan vilkår, står det i domen. Retten gav frådrag i straffa på grunn av lang «liggjetid» hjå Nav.

Eit endeleg vedtak frå Nav var klart i mars 2022, og vedkomande betalte det han skulda 14 dagar etterpå. Han trudde då at saka var avslutta. Åtte månader etter vart saka meld til politiet, som ifylgje retten har handtert saka svært effektivt. Retten ser på det som formildande at mannen erkjende straffskuld og aksepterte ein tilståingsdom.