Dømd etter ulukke

Ein kvemming som krasja i Øystese i slutten av mars, er dømd til fengsel i 24 dagar, med ei prøvetid på to år. Det kjem fram i ein tilståingsdom frå Hordaland tingrett.

På ei rett strekning kom bilen over i motsett køyrefelt, og frontkolliderte i ein lyktestolpe på fylkesveg 79. Bilen fekk betydelege skadar. Føraren var oppegåande etter hendinga, men vart frakta til sjukehus.

Mannen vert straffa både for å ha køyrt i rusa tilstand og for å ha køyrt aktlaust. I prøvetida må han gjennomføra eit program mot ruspåverka køyring, og han er vidare dømd til å betala ei bot på 65.000 kroner. Om bilføraren vil sitja bak rattet att, må han venta i 2,5 år og ta førarkortet på nytt.