Doblar godtgjersla til varaordføraren
Frode Nygård (Frp) får dobla godtgjersla for å vera varaordførar.
I same slengen mistar han retten til å verta kjøpt fri inntil ein dag i veka. Det vedtok heradsstyret samrøystes 12. mai.
MDG, R og SV ynskte å utsetja saka for å få meir informasjon om kva ekstra oppgåver varaordføraren har fått som gjer det naudsynt å auka godtgjersla frå 10 til 20 prosent av ordførargodtgjersla. Framlegget fall.
Håvard Gjerde (R) meiner saka kom opp på feil grunnlag. Ei endring av godtgjersla bør gjerast ut frå prinsipielle vurderingar, ikkje arbeidstilhøvet til ein enkeltperson, meiner han. Jostein Ljones (Sp) meiner jobben ikkje skal påverka nivået på godtgjersla.
I sakspapira viser rådmannen til at Nygård tapar pengar på å vera varaordførar, av di arbeidsgjevaren ikkje kan nytta han til entreprenøroppdrag utanfor kommunen så lenge han har det politiske vervet. Dessutan framhevar ho at han har fått utvida politiske arbeidsoppgåver. Initiativet til auken i godtgjersle kom frå ordførar Torgeir Næss (Ap).
Fleire skrytte av innsatsen til Nygård. Gjerde, til dømes, er «veldig imponert». Ljones sa at han er glad for at varaordføraren gjer ein stor innsats, men at det vert forventa. Gry M. Kyrkjeeide (Frp) framheva at kvemmingane er tente med ein varaordførar som er tilgjengeleg.
Even Øyri (Ap) meiner auken i godtgjersla allereie er delvis finansiert, ettersom ordførar Torgeir Næss (Ap) fekk redusert godtgjersla med 50.000 til 938.597 kroner i 2020-budsjettet. Gjerde er usamd. Han trur ikkje intensjonen med kuttet var å finansiera auken.
Den nye godtgjersla til varaordføraren er 187.719 kroner.
