Dobbeltrøysta sikra flytebryggje ved Skoro

Ettersom fire røysta for og fire røysta mot dispensasjonen frå kommuneplanen og byggjeforbodet i strandsona, vart dobbelrøysta til Randa avgjerande i møtet i planutvalet 10. mai. Randa stod dessutan bak framlegget han stilte seg bak.

I det lange framlegget legg han vekt på mellom anna føringar i samfunnsdelen i kommuneplanen, trongen for trygg tilkome og at bryggja med landgang ved Jarane eller «Skårolandet» vil styrkja garden, ikkje skjemma området og vil vera råd å fjerna. Bryggja er 10,2 meter lang og 2,4 meter brei.

Frå før finst ein kai, ein slipp og eit sjøhus på staden, men ifylgje søknaden er sjøhuset i dårleg stand og kaien snart det same.

– Kva er gard i drift?

Medan Even Øyri (Ap) støtta søkjaren saman med H og Frp, støtta Vigdis Håland (Ap) rådmannen og la vekt på at garden ikkje er i drift. Om garden kjem i drift, kan søkjaren senda ny søknad, påpeika ho.

– Kva legg ein i gard i drift? Det har vore ulike versjonar av det, spurde Bjørgulv Hauger (Frp).

Han meiner det naturleg å leggja vekt på plasseringa og kvar det er naturleg å driva gard, og om garden og kulturlandskapet vert haldne i hevd.

Festar lit

Håland opplyste at ho ikkje er jurist, men festar lit til vurderingane til rådmannen. Hauger retta difor spørsmålet til sistnemnde. Leiar for eining for plan og byggjesak, Heidi E. Ørjansen, framheva at ingen bur på garden og at tiltaket ikkje er naudsynt for landbrukseigedomen, ut frå ein del faktorar i plan- og bygningslova og kommuneplanen. Ho la dessutan vekt på at søkjaren har tilkome i dag, og at det nye tiltaket difor ikkje er naudsynt med tanke på dagens bruk av eigedomen som hytte.

Silje Aksnes (Sp) meiner det bør vera ei form for produksjon som skapar inntekt på ein gard i drift. Sjølv om det kan verta dyrt å rehabilitera dagens tilkome, er det mogeleg, påpeika ho.

Eit viktig motargument frå rådmannen og Statsforvaltaren er at bryggja vil privatisera området. Håland ynskte å vita kva det tyder i praksis. Ørjansen sa at ein uansett privatiserer strandsona med private tiltak som ålmenta ikkje kan nytta, men at dei kan ha større og mindre fylgjer på ulike stader. I Fyksesund gjev området unike naturopplevingar til reisande i mellom anna ribb og kajakk, framheva ho.

– Me meiner tiltaket vil privatisera fjordlandskapet, sa Ørjansen, som meiner privatisering bør verta teke opp som eige tema i utvalet.

Ville utsetja

Hauger tok til orde for å utsetja saka, som allereie var utsett ein gong tidlegare. Grunngjevinga var at Nils Frode Skaar ikkje hadde fått tilbakemelding om ein e-post han på vegner av søkjar og eigar Skoro AS sende heradet før saka skulle handsamast sist, og som var grunnlaget for utsetjinga den gongen. Dermed hadde søkjaren heller ikkje høve til å kommentera utspelet.

Ørjansen opplyste at innhaldet i e-posten berre er kommentert i sakspapira. Sp og Ap sikra fleirtal mot utsetjing.

I e-posten skriv Skaar at han truleg kunne ha spara seg for å søkja om dispensasjon, ettersom plan- og bygningslova opnar for tiltak ved sjøen som tener landbruk eller ferdsle til sjøs, og kommuneplanen opnar for tiltak som er naudsynte i landbruket. Ettersom Skoro er ein landbrukseigedom, trengst ikkje dispensasjonen, meiner han.

Rådmannen held fast ved at tiltaket føreset dispensasjon. Ho viser til at det ikkje bur folk på den veglause eigedomen, at det ikkje finst «konkrete landbruksinteresser» og at bruket er sikra bruks- og forkjøpsrett til sjøhuset. Bryggja er heller ikkje naudsynt av omsyn til ferdsle til sjøs, meiner ho, og viser til førearbeid til plan- og bygningslova som tilseier at trafikk knytt til hytter ikkje stettar kravet.

Statsforvaltaren klaga nyleg på bryggjevedtaket. Han viser til at eigedomen har brukande tilkome frå sjøsida, og meiner tiltaket vil vera privatiserande og få negative verknader for mellom anna landskap og friluftsliv i eit relativt urørt område. Desse er sterke interesser i Fyksesund, meiner han.

HF gjer merksam på at Nils Frode Skaar er styreleiar i Hordaland Folkeblad AS. Red.