Direktorat er uroa over utslepp

Anlegget ligg i industriområdet Bakka–Breievne.

Statsforvaltaren har fått to høyringssvar i saka. Det eine er frå Fiskeridirektoratet, som er uroa over at det ikkje verkar å vera sikkert at vatnet vert vaska reint for kjemikaliar, då verksemda «går ut frå» at det ikkje vil vere restar av kjemikaliar igjen i vatnet når det kjem ut i sjø.

Kjellmi oppgjev at det vil frakta fire ulike kjemikaliar i tankbil. Alle unnateke eitt vert opplyst å vera giftige og kan mellom anna føra til at fisk døyr om ein får utslepp til vatn.

– Det må difor til haldast fokus på at det ikkje kjem kjemikaliar ut i sjø, skriv direktoratet.

Ut frå desse vurderingane tilrår direktoratet at tiltakshavaren vert pålagt rutinemessig kontroll av utsleppsvatnet til sjø. Verksemda må leggja fram ein plan for å overvaka kvaliteten på utsleppsvatnet. Resultata frå overvakinga kan evaluerast etter til dømes tre år, skriv etaten.

Havforskingsinstituttet har registrert eit lokalt viktig gytefelt utanfor der vaskehallen er tenkt å liggja, opplyser Fiskeridirektoratet.

Det andre høyringssvaret kom frå Kvam herad. Rådmannen skriv at heradet har eit avløpssystem som går forbi tomta, og det er lagt stikkleidning inn på tomta for mogleg tilkopling. Avløpet vert ført til ein slamavskiljar som ligg sør for Hardanger Fiskeforedling AS. Utløp frå slamavskiljaren vert ført til sjøen på 20 meters djupn.

Ifylgje rådmannen har Kvam herad liten kompetanse til å kunna vurdera effekten av å sleppa spylevatn frå tankvask inn på avløpssystemet til heradet. Kva for konsentrasjonar det er snakk om, og kva effekt det vil ha på utsleppet som ligg nær merdane til fiskeslakteriet, veit ein ikkje. Det rådmannen veit, er at tryggleiksdatablad for fleire av stoffa er merkte med at dei ikkje må sleppast inn på avløps- eller overvassnettet. Vaskevatnet må difor ikkje koma inn på nettet.