Digital sportsklubb i Kvam
Dataspel ser nokre på som asosial latskap. I dag kan du skriva spelekompetanse på cv-en og ta årsstudium i akademisk e-sport.
Noregs fyrste offentlege e-sportssenter vart etablert i Sarpsborg i 2018. No er eit e-sportssenter på veg opp og fram i Kvam. Med god hjelp frå utekontakt Siriann Lillevik vart Kvam e-sport stifta i januar. Ho har lært minst like mykje som ungdommane i prosessen.
— Ofte lyt eg rekkja opp handa og minna dei på at det sit ei dame som er fødd på 70-talet her. Kva betyr alle desse orda? spør Lillevik støtt og stadig.
Mange er aktive
Ungdata-undersøkinga som vart publisert i byrjinga av mai, viser at 19 prosent av elevane i 5.–7. klasse i Kvam spelar dataspel eller tv-spel i tre timar eller meir på ein vanleg dag. På ungdomsskulen svarar 21 prosent av elevane at dei spelar dataspel eller tv-spel i meir enn tre timar i gjennomsnitt per dag.
I den tilsvarande undersøkinga frå 2017 svara 13 prosent av 10.-klassingane at dei spela dataspel eller tv-spel i to timar eller meir på ein vanleg dag.
Eit e-sportssenter er ein fysisk samleplass der ungdommar kan koma og spela dataspel til faste tider, på same måte som andre går på fotballtrening eller musikkøving. Dette ynskjer dei å få til for å få ungdommane ut frå rommet.
Førebels har Kvam e-sport fått låna lokale i Holmatun i Øystese til møte. I vinter fekk dei sju bord gratis av Øvreviken Pizzeria, som dei får lagra i den tidlegare ungdomsklubben. Arne-Kristian Glück-Teigland, som eig ungdomshuset, har ikkje sjølv noko forhold til e-sport.
— Men eg har eit forhold til engasjement. Og engasjert ungdom veks ikkje på tre. Dei lyt me klappa for og støtta, seier Glück-Teigland.
Læra av andre
I arbeidet med å få e-sportssenteret i gang har e-sportssenteret vore i kontakt med liknande prosjekt, mellom anna i Førde. Der er gaming-rommet plassert på treningssenteret, og ungdommane får praktisert interessa for dataspel på ein sunn og sosial måte. Og det er ikkje berre dataspel det går i. Fokuset er minst like mykje på søvn, mat og fysisk trening. Det er eigne treningsdagar der dei berre har fokus på fysisk aktivitet, for å hindra belastningsskadar. Dette ynskjer e-sportssenteret å få til i Kvam òg.
— Den fysiske treninga lyt vera moro. Det er ikkje snakk om tyngre intervalltreningar og styrketrening, men meir lagsport. Fotball, til dømes, seier styremedlem i klubben, Eirik Botnen.
No er dei engasjerte ungdommane i gang med å setja opp budsjett og søkja om pengar, ifylgje styreleiar Daniel Olsen. Han trur e-sport er den neste store sporten i verda. Å ha e-sport i kommunen vil truleg hjelpa mange av dei ungdommane som fell utanfor dei store sportsgreinene, som fotball og ski. Olsen seier det er viktig å koma seg ut og treffa andre.
Dei reknar med å trenga rundt 300.000 kroner for å koma i gang.
— Kva skal pengane brukast til?
— I hovudsak datamaskiner. Det er det som kostar mest. Me treng rundt ti maskiner, seier Olsen.
I desember fekk klubben 5.000 kroner av Mats Byrkjeland. Byrkjeland fekk pengane då han fekk delt ut ein av to eldsjelprisar i desember i fjor.
— Kvifor valde du å støtta e-sportsklubben?
— Det er viktig for meg å støtta ungdomen i bygda, og så fekk eg høyra om dette prosjektet som var i startgropa. Eg vann eldsjelprisen for å ha laga ein app. Kanskje kan det inspirera ungdom til å ta same utdanningsveg som meg? seier Byrkjeland.
Vis interesse
Sonen til Siriann Lillevik, Brigt Lillevik Botnen, er aktiv i e-sportsmiljøet og med i styret i Kvam e-sport. Det har gjeve henne eit unikt innblikk i den ukjende digitale verda. Det å engasjera seg for kva ungdommen driv med, er viktig, meiner ho. Ein lyt spørja, utforska og visa interesse.
— Dei som er skeptiske, bør setja seg ned med ungane og prøva sjølve. Då kan dei forstå kva det dreier seg om, seier Lillevik.
I fleire år stod ho som mange andre og gaula gjennom vegger og golv at middagen var klar. Høgare, og hakket meir forbanna, for kvar gong. Det var ikkje berre å gå ut av spelet, slik ho trudde. No som Siriann forstår meir av kva det går i, har dei funne ei løysing som er bra for begge partar.
— Når det er ein halvtime til middag, ringjer eg på til han. Då veit han at han må byrja å sjå etter ein «safe-spot», og førebu seg på å kunna gå frå spelet. Når tida har gått, kjem han, og eg er korkje hås i stemma eller oppglødd, seier Lillevik.
Dataspel på cv-en
I dag anbefaler Nav at dei som driv med dataspel og e-sport, skriv det på cv-en. Det skriv NRK i ei sak om e-sport i desember. Mange bedrifter er interesserte i dei som har spelekompetanse.
— Personar som gamar, lærer raskt. Dei har digitale ferdigheiter som er nyttige i alle jobbar. Dei er taktiske, flinke på problemløysing og har god reaksjonsevne, seier Ingvild Haugland, fungerande leiar i ungdomsavdelinga i Nav Bergen til NRK.
Nokre spel krev også tett samarbeid med andre spelarar og planlegging av komplekse og djupe strategiar. Det igjen krev gode leiarar.
