Dette var turfavorittane i 2021

Dronning Sonjas panoramatur i Hardanger var det mest populære turforslaget på Ut.no i 2021, medan Flokehyttene i Sunnhordland vart mest søkt på blant DNT-hyttene, viser tal frå Ut.no.

– Dei siste åra har naturen vore ein fristad for mange, og etterspurnaden etter turforslag har vore enorm. Mange vil kome seg meir ut, men er usikre på kvar dei skal gå. Bruk av Ut.no og Sjekkut-funksjonen i appen er stadig meir populære måtar å finne nye turmål, seier generalsekretær i DNT, Dag Terje Klarp Solvang, i ei pressemelding.

Dei mest leste turforslaga i året som har gått er Dronning Sonjas panoramatur (Hardanger), Rampestreken (Romsdalen), Romsdalseggen (Romsdalen), Gaustatoppen (Telemark) og Galdhøpiggen (Jotunheimen).

Dei tre mest populære DNT-rutene i 2021 er frå Hodnaberg til Kiellandbu, frå Loen til Skålabu/Skålatårnet og frå Østerbø til Vassbygdi. Medan dei mest populære hyttene er Flokehyttene (Haugesund turistforeining), Skåpet (Stavanger turistforeining) og Skålatårnet (Bergen og Hordaland turlag).

– Ein treng ikkje å reise langt for å oppleve friluftslivet. Din nye turfavoritt kan liggje like rundt hjørnet, og tilbod som Ut er veldig nyttig når du planlegg slike turar, seier Klarp Solvang.