– Dette må verta ein tradisjon

Fredag ettermiddag var det framleis roleg då HF tok turen til skisenteret i Furedalen litt over klokka 16. I eit telt nedanfor varmestova hadde dei fyrste gjestene funne seg til rette ved langborda, med noko godt i glaset.

– Det vert nok meir «trøkk» om ein time eller to, seier Vetle Vambheim Steffensen.

Saman med hyttenabo Steffen Vike Holm står han bak den nye verksemda, Kvamskogen Afterski AS, som inviterte til afterski ved skianlegget onsdag til fredag.

Etterlengta tilstelling

Ei av dei som var tidleg på plass i teltet, var Rita Kleiven frå Norheimsund. Ho og veninna, Maria Sande Koppen, var godt nøgde med å ha sikra eit bord til seg sjølve og resten av gruppa dei var saman med.

Båe har familiar som har hytte i nærleiken av skitrekket. Dei fortel at tilbodet har vore etterlengta. Dei to veninnene kjøpte billettar til arrangementet dagen etter at dei vart lagde ut for sal.

– Me har venta lenge på noko sånt. Dette må verta ein tradisjon! seier Kleiven.

Tidlegare på dagen hadde dei lada opp til moroa i ekte afterski-ånd, nemleg med nokre timar på ski i bakken. Båe gledde seg til ein kveld med musikk og dans.

– Kvifor er afterski moro?

– Det er den gode stemninga. Og så er det veldig kjekt med allsong, seier Koppen.

Utseld alle dagar

Onsdag og torsdag var Koppen ei av dei som hjelpte til under tilstellinga. Fredag hadde nokre andre damer teke over stafettpinnen. I baren stod mellom andre Ronja Garen, Amalie Eide Aase, Ingrid Almås Eide og Maiken Kyrkjeeide Neteland.

Aase er ei av dei som har vore på arbeid dei tre dagane arrangementet har gått føre seg. Ho meiner at ein kan ha det like kjekt på den andre sida av bardisken.

– Det er veldig sosialt, og me får med oss like mykje som gjestene, om ikkje meir, seier ho.

Alle dagane vart utselde før det heile braka laus onsdag. Medan det var flest hyttefolk som tok turen innom dei to fyrste dagane, var det venta at langt fleire kvemmingar ville delta på tilstellinga fredag.

– Litt nervøse

Kvamskogen Afterski har AS Kvam Fjellheisar, verksemda bak Furedalen Alpin, med seg på laget. Dagleg leiar Jan Guttorm Skeie påpeikar at det var langt frå ei sjølvfølgje at det skulle vera så stor interesse for arrangementet.

– Det var ein periode der me var nervøse for om det ville koma folk i det heile. Det synte seg ikkje å verta eit problem, seier Skeie.

Å skipa til afterski krev tid og planlegging. Ifylgje Steffensen har dei siste månadene vore travle. Spesielt den siste veka har vore intens, med arbeid nesten døgeret rundt, fortel bergensaren. Men trass ein hektisk innspurt er han godt nøgd med gjennomføringa av arrangementet.

– Det har gått veldig greitt, utruleg nok, seier han.

Knekt gjerde

Arrangørane meiner at dei har vore godt førebudde. For å syrgja for at gjennomføringa skulle verta sikrast mogleg, var det sett ei grense på 200 gjester per dag, sjølv om teltet kunne ha romma kring 250 personar, fortel Steffensen. I tillegg var 12–14 vakter på plass kvar av dagane.

Festglade i alle aldrar har møtt opp i teltet. Medan dei yngste har vore 18 år, var dei eldste nærare 80.

– Dei har vore like blide alle saman. Eg føler at me har klara å treffa ganske breitt, seier Steffensen.

Så livleg vart det onsdag at gjerdet ved scena knakk på grunn av stor pågang. Holm seier at vertskapet tolka det som eit teikn på at gjestene kosa seg. Torsdag var gjerdet oppe att, noko ekstra sikra. Då var det berre å halda fram med å hoppa og dansa, fortel arrangørane.

Har lagt til rette

Tilbakemeldingane frå dei som har teke kontakt med arrangøren, har vore svært gode, fortel Steffensen. Ifylgje han har dei fleste gjeve uttrykk for at dei er glade for at det vert skipa til noko slikt på Kvamskogen.

– Har alle vore positive?

– Me har fått eit par kommentarar og éin naboklage. Elles har folk berre vore blide og nøgde, seier Steffensen.

Han fortel at dei har prøva å ta omsyn til hytteeigarar og andre i området. Både Kvam herad, politiet og dei næraste hyttenaboane vart informerte om tilstellinga. Arrangementet har vorte avslutta klokka 22.

– Me prøver å leggja til rette så godt som me klarar, seier Holm.

– Slik me trudde

Dei som møtte opp i teltet, hadde kjøpt billettar på førehand. Arrangøren ynskte denne ordninga for å ha kontroll på talet på gjester, forklarar Skeie.

Han tykkjer det er svært positivt at det har vore stor pågang, og fortel at det hadde vore rom for å ha eit større telt og teke inn fleire gjester. Men det er fleire omsyn å ta, understrekar han.

– Slik som det har vore i dag, med strålande sol, kunne me ha gjort det. Men hadde det vore same respons om det hadde vore dårleg vêr? undrast Skeie.

Når den fyrste runden med afterski i Furedalen er over, vil gjengen bak tilskipinga evaluera tiltaket. Men at det vil verta gjenteke, er dei alle samde om.

– Det har vore god stemning, og folk har oppført seg fint. No har me noko å byggja vidare på. Det synte seg at det var ein marknad for eit slikt arrangement, slik me trudde, konstaterer Holm.