– Dette gjer at me tapar pengar

BKK eig nettet i Mundheim. Før Hansen kan underteikna ein såkalla plusskundeavtale og byrja selja den straumen han ikkje sjølv brukar, må anlegget godkjennast av BKK.

Anlegget var klart den 19. mai, men godkjenninga lèt venta på seg. Hansen fortel han jamleg har vore i kontakt med BKK, men at han har ikkje fått lovnader om når dei kan koma. Også naboen hans Egidijus Siksnius, som har bygt eit solcellepanel på bakken i hagen, er i same situasjon.

– Tapar pengar

Dei to solcelleeigarane går for det første glipp av inntektene anlegga kan generera i dei varme og solrike sommarmånadane. Som om ikkje det var nok, ønskjer statsføretaket Enova å redusera stønaden til solanlegg i bustader frå 1. oktober. Enova betalar først når plusskundeavtalen er på plass. Skjer det etter 1. oktober, kan Hansen og Siksnius risikera å få mindre stønad.

Hansen fortel at han har brukt nærare 200.000 kroner på solcelleanlegget. Siksnius har brukt om lag 190.000 kroner.

– Det er mykje pengar, og det er veldig fortvilande å koma opp i den situasjonen me har kome i, seier Hansen.

Ifølgje Siksnius er det ikkje omfattande arbeid BKK må utføra.

– Ein treng berre å koma på besøk og sjå at målaren går rett. Det burde vore gjort på fem minutt, seier han.

– Ikkje unikt

Det var lenge Kvinnherad Energi AS som eigde nettet i Mundheim. For nokre år sidan overtok BKK nettet, fortel Hansen.

Anlegga til Hansen og Siksnius vart leverte og installerte av Sol og Vindkraft AS. Verksemda har hovudkontor i Eikelandsosen. Dagleg leiar Åge Lygre fortel at historia Hansen og Siksnius ikkje er unik.

– Eg har dessverre høyrt om fleire BKK-kundar som opplever at godkjenninga går tregt. Samstundes har eg høyrt om andre som opplever at det har gått raskt. Me hadde til dømes nyleg ein kunde i Fana. Der vart alt ordna på få dagar. Kan det vera i distrikta det tek lengst tid? undrar han.

– Ekstra tiltak

HF kontakta BKK om saka fredag 7. juli. Kommunikasjonsrådgjevar Anne Mette Tuvin skriv i ein e-post at når nokon vil teikna plusskundeavtale, må BKK undersøkja om straumnettet toler at vedkomande leverer straum. Er nettet sterkt nok, vert søknaden godkjend i løpet av eit par veker. Er nettet ikkje sterkt nok, vert det meir komplisert.

Til dømes kan BKK måtta justera spenninga i ein transformator eller forsterka lågspenningsnettet. Av og til kan det òg vera naudsynt å montera nye nettstasjonar for å auka kapasiteten. Når større tiltak er naudsynte, har BKK for tida ei behandlingstid på åtte veker.

– Behandlingstida vert påverka av om me må gjera ekstra tiltak før godkjenning og talet på saker me har til behandling. Eg kan diverre ikkje svara på kor lang tid det tek før desse kundane får godkjent anlegga. Saka er under behandling, skriv ho.

Same kveld som HF kontakta BKK, fekk dei to solcelleeigarane i Mundheim beskjed om at BKK hadde godkjent dei som plusskundar.