— Dette er ikkje nok gjennomtenkt

Øystese Båtlag ynskjer å utvida hamne- og parkeringskapasiteten ved Evjo i Øystese. Planen er å utvida hamna med to om lag åtti meter lange betongbryggjer – den eine der bølgjebrytaren står i dag, og den andre utom denne igjen. Ytst skal dagens bølgjebrytar liggja. Det er planlagt gangbru mellom dei nye bryggjene.

I midten av august vart søknaden om dispensasjon send til Kvam herad. I samband med nabovarslinga fekk Arkoconsult AS, som er ansvarleg søkjar for båtlaget, inn fire merknader.

— Uakseptabelt

Ein av merknadane kom frå Bjørn Trygve Torpe som representant for Vavoll Eigedom AS. Torpe har ingenting å seia på anlegget i sjøen. Det er resultatet på land som uroar han.

– Kva ein tenkjer med den aukande biltrafikken og parkeringa på land, er eg svært kritisk til. Dette er ikkje nok gjennomtenkt, skriv Torpe i merknaden.

Han meiner at dagens trafikk allereie er svært høg. Slik parkeringa er skissert, med 54 parkeringsplassar, vert det meir trafikkfarleg. Torpe tenkjer spesielt på tilfelle der ein fraktar båt med bil og hengar.

– For å svinga seg ned på slippen ved sjøsetjing og opptak, må ein snu på området til Vavoll Eigedom. Vert utvidinga som ein søkjer om, må Vavoll Eigedom vurdera tiltak som til dømes å stengja fysisk frå eigedomen. Dette vil då gjera det svært mykje verre for bil med hengar å snu ved sjøsetjing og opptak, skriv han.

Han nemner at det er svært mykje feilparkering i området til Vavoll Eigedom. I samband med opptak eller sjøsetjing av båt er det ofte lange køyretøy som vert forlatne for ein periode. Det er uakseptabelt, meiner Torpe.

Med ei større båthamn er han redd feilparkering vil verta eit aukande problem.

Minner om leidningar

I ein merknad frå Kvam herad er det det som ligg under vassoverflata som vert teke opp. Det står mellom anna at det ikkje er informert om eller vist at det ligg hovudleidningar for avløp nord og aust for båthamna sitt område. Hovudleidningane overfører spillvatn frå delar av Øystese og må ikkje utsetjast for auka fare for brot eller klemfare i samband med utvidinga, skriv juridisk rådgjevar i Kvam herad, Karoline Borthen.

Heradet gjer Arkoconsult AS merksam på at båtførarar bør informerast om at det er leidningsnett i området, slik at det ikkje vert ankra opp fartøy utanfor gjestebryggja som kan koma i konflikt med leidningsnettet.

Martin Rune Byrkjeland skriv på vegner av Hardanger Betong AS at tilkoma til kaien til verksemda ikkje må forverrast. Verksemda får sand og singel levert med båtar.