- Dette er i mi ånd!

- Det er to ord som har vorte nytta mykje om Breidablik og arbeidet eg har gjort her: fantastisk og imponerande. Sjølv plar eg ikkje nytta dei orda noko særleg. Men i dag vil eg gjera det. Det er fantastisk å sjå så mange folk her på Breidablik i eit slikt vêr. Det lovar godt. Og eg er imponert over arbeidet turlaget har lagt ned. Dette er i mi ånd.Det sa Bjarne Huse, mannen som gjennom 40 år bygde hyttetunet Breidablik 1.162 meter over havet, før han skar over den raude snora og med det erklærte Breidablik for opna. No har hyttetunet fått ei ny form, med to nye hytter.

Vil få fleire til fjells

Prosessen har vore lang og protestane mange. Nokre såg med fortviling på at delar av eit livsverk vart rive. Andre gledde seg over at fleire kunne få oppleva eventyrtunet langt der oppi fjellet. Hyttefaren sjølv høyrer til siste gruppe.- Det er store kjensler innblanda i slike prosjekt som dette. Det har vorte skapt mange minne her oppe, og det er mange som har eit tett forhold til Breidablik. Her kan ein lata tankane flyta fritt og sleppa unna det daglege stresset. Bergen og Hordaland turlag har no gjort om på noko av forma på tunet. Men alle er framleis velkomne til Breidablik. Og det er vel nettopp denne gjestfridomen som har gjort Breidablik til det det er, sa ordførar Jostein Ljones under opninga. I 2014 selde Bjarne Huse og kona Anne Marit Huse Breidablik til turlaget for ein symbolsk sum. Sidan opplevde turlaget at fleire ynskte å oppleva Breidablik enn det det var plass til.- Då me overtok, såg me at denne staden var ein suksess. Me tenkte: kva kan me gjera for at fleire skal få oppleva dette? Føresetnaden for bygginga har heile tida vore at me skulle ta vare på det som var. Me ynskte å ta vare på stemninga og atmosfæren. Det synest eg me har klart no. Me sit med stor respekt for det du har skapt, Bjarne, og er verkeleg takksame for Breidablik, sa dagleg leiar i Bergen og Hordaland turlag, Helene Ødven.

- Me ynskjer å gje flest mogleg sjansen til å få oppleva dette fantastiske fjellområdet, slik Bjarne sitt ynske alltid har vore. Dette er eit praktisk bygg med respekt for det gamle, sa styreleiar Elisabeth Skage.

Lang prosess

Planlegginga av opprustinga av tunet starta i 2016 og tok to år.- Det var ein omstendeleg prosess, og eg har sikkert over hundre ulike teikningar med forslag til utforming. Me byrja fyrst å prosjektera ei hytte på kanten, men fann ut at dette ville øydeleggja tunet fordi det skugga for utsikta. Til slutt landa me på at det beste var å ta ned det største av bygga av di den hadde den finaste tomta. No meiner eg me har fått ei hytte som passar veldig godt inn i tunet, seier Johnny Bjørge, hytte- og ruteansvarleg i Bergen og Hordaland turlag og prosjektleiar for bygginga på Breidablik. Resultatet har vorte akkurat slik prosjektleiaren såg for seg.- Det har vore veldig viktig for oss å ta vare på tunet Bjarne Huse har laga. For å gjera det, har me nytta arkitekten Eilif Bjørge, som er utruleg flink til å utforma bygg og som såg tunet i ein heilskap. Då han såg tunet fyrste gong, ville han ikkje røra det. Så byrja arkitekthjernen å jobba, og snart kom han med eit forslag om korleis hyttene kunne sjå ut. Materiala som er nytta, stein og tre, og forma på bygga gjer at me har klart å bevara tunet. Hovudhytta er ikkje ruvande, men ser berre ut som eit smalt bygg når du ser det frå inngangen til tunet. Naturmateriala som er nytta, glir inn i miljøet her oppe. Dette gjer at bygga passar godt inn, seier han.

I år har turlaget budsjettert med 2.000 overnattingar på Breidablik.- Me får sjå om det stemmer, men eg trur ikkje det er så urealistisk. Naturen og tunet trekkjer folk. Det har ei lang historie som mange er nysgjerrige på, seier Bjørge.

Trassa vêr og vind

Opningsdagen viste at interessa for å vitja Breidablik var til stades, og vêret var inga hindring for turfolket som ville få med seg opninga. Hovudhytta var fylt til randa, og truleg var rundt to hundre innom. Ein festkomité med representantar for Bergen og Hordaland turlag og Kvam turlag laga i stand mat, drikke og fyr i omnen til dei vitjande.- Nesten tjue kilo spekemat er ete, fortel Inger Dysvik.Mengda hyttegjester var større enn festkomiteen hadde venta.- Turfolk er ute i allslags vêr og vind. Eg trur mange er glade i Breidablik og går uansett vêr. Nokre er nok forvitne på korleis det har vorte. Enkelte har vore sinte på ombygginga. Eg trur dei som har vore her, truleg har endra meining når dei dei har sett korleis det har vorte, seier Dysvik. - Det har vorte kjempeflott her. Det er ei utruleg fin hytte med god løysingar og plass til mange. Her kan mange få gode opplevingar, seier Anna Mo-Bjørklund.

- Godt vareteke

Måndagen før opninga fekk Huse sjå det nye hyttetunet for fyrste gong.- Eg har følgt med på prosessen og sett bilete undervegs, så eg var førebudd på kva eg skulle møta. Eg er veldig godt nøgd med korleis det har vorte. Det har kome ei tenleg hytte, og eg er spesielt imponert over uthuset. Løysingane har ei funksjonell meining. Der er bord å sitja ved og senger å sova i, seier han.At stemninga på tunet skulle takast vare på, har aldri vore eit krav Huse har sett. Han synest likevel det er fint at turlaget har vore oppteke av det, og lukkast.- Eg såg med ein gong eg kom opp at dei hadde lukkast med å ta vare på stemninga som høyrer til Breidablik. Eg fann att mykje frå det gamle, og det var godt vareteke. Dei var innstilte på det sjølve, og har klart det. Det er veldig kjekt for meg. Dei er fjellfolk, dei òg. Me tenkjer nok litt i same banar. Deira visjon har vore å få folk ut. Det er det eg òg har ynskt heile livet. Den nye nytta kan nok føra til at endå fleire vil verta kjende med Breidablik. Då vert dei ikkje skuffa, seier han.

- Stor respekt

Mannen som har stått for bygginga av dei nye hyttene på Breidablik, er Bjørn Vike. Han fortel at arbeidet har vore krevjande, men ei fin oppleving. - Bjarne har funne ein vêrutsatt plass høgt til fjells. Å jobba på ein slik nydeleg stad, med det «breida blikk», vidsynet, over Hardangerfjorden og Folgefonna, var flott. Eg kjende at eg gjekk på historisk grunn når eg gjekk rundt på hellene til ein som har brukt livet sitt på å byggja opp staden. Det har vore ein spesiell jobb, fortel Vike. Å byggja på ein stad som Breidablik fører med seg mykje logistikk. Alt må planleggjast, frå overnatting, mat og fyrstehjelpsutstyr til spikar og materialar. Helikopterturane er uføreseielege, og følgjet må difor alltid ha med seg forsyningar til ein månad fram i tid.- Ein må rett og slett trivast i fjellet og lika uvêret og det naturen har å koma med. Det nyttar ikkje å jobba slik om ein vert sur når det blæs og regnar. Det er avgjerande å ha god kjemi med dei ein jobbar saman med, og at alle synest slikt arbeid er ålreit. Eg har vore mykje på turar i verda med klatring og fotturar. Å byggja på Breidablik vert som ein ekspedisjon og noko som verkar nesten urealistisk å gjennomføra. Men så veit ein at det går an likevel, og difor vert det ein veldig spanande jobb.

- Kva tenkjer du om arbeidet Bjarne Huse har lagt ned etter at du sjølv har bygd på Breidablik?- Då eg såg Bjarne på opninga, kunne eg ikkje fortelja han om det dårlege vêret, for eg visste at kva han hadde vore gjennom under bygginga. Eg opplever det som å koma i bokseringen med Bjarne og berre innsjå at eg må fullstendig overgje meg. Han har skapt ei merkevare, samstundes som han har vore veldig inkluderande og fått alle til å kjenna seg velkomne. Eg har stor respekt for det han og kona har stått for. Eg er sikker på at ingen kan vera betre eigna enn Bergen og Hordaland turlag til å overta Breidablik, men å fylla skoa til Bjarne og Anne Marit må ein berre innsjå at er heilt urealistisk. Eg har stor respekt for arbeidet dei har gjort, og nesten ikkje ord til å skildra det.

Fekk Haugbondens knagg

Under middagen for inviterte på Breidablik laurdag kveld overrekte Huse Haugbondens knagg til Vike. - Eg synest arbeidet som er gjort, er veldig godt gjennomført, og at Bjørn Vike fortente ei slik merksemd. Det er på ein måte ein slags kulturpris frå Haugbonden. Då eg gav den, sa eg mellom anna at eg var fasinert over at han hadde frose så mykje medan han hadde arbeidd. Der kjende eg meg att, fortel Huse.Vike fortel at han vert rørt berre han får spørsmålet om korleis det var å ta imot Haugbondens knagg. - Det viser jo at han verkeleg skjønar kva eg driv på med. For meg symboliserer ein slik pris ein gjensidig respekt for kvarandre. Eg set veldig pris på ei slik anerkjenning, seier han.For Vike tyder det mykje at Huse er nøgd med korleis Breidablik har vorte. - Det er nok eit fåtal menneske som hadde takla dette på den måten han har gjort. Eg har jo faktisk rive to av bygga han har bygd opp! Hans reaksjon seier mykje om hans kvalitetar og styrkar. Med måten han ser dette på, viser han at han er «heil ved». Han maktar å sjå inn i framtida og sjå at dette er vegen framover. Det å få folk og ungdom opp i fjellet, og å få oppleva Breidablik, slik at dei kan sjå kor vakkert landet vårt er, er veldig viktig. Då kan dei sjå kor viktig det er å verna om naturen vår.

Eline Sandnes Fosseredaksjon@hf.no