Detaljplanen er godkjend
Noregs vassdrags- og energidirektorat (NVE) krev ikkje at alle skal få tilgang til vegen til Bjølsegrøvatnet.
Det kjem fram i godkjenninga av detaljplanen for miljø og landskap knytt til utbetringa av dammen ved vatnet. Ein ny skal på plass, og for å få det til, lyt det byggjast både vegar og tunnelar.
Å få planen godkjend er for så vidt ein milepæl, men også teknisk plan og ein godkjend utsleppssøknad må vera på plass før Statkraft Energi AS (SE) byrjar å sjå etter entreprenør. Det opplyser prosjektleiar Jørn Fosen Simonsen i SE.
– Tidsplanen er difor omtrent som før. Me håpar å byrja til sommaren eller hausten neste år, skriv Simonsen i ein e-post.
Godkjend på vilkår
NVE har stilt fleire vilkår for godkjenninga. SE må mellom anna oppretta dialog med Kvam herad og andre med rettar i området for å vurdera tilgangen til ålmenta på den nye vegen.
I høyringsrunden kravde fleire, mellom dei Kvam herad, at tunnelen skal vera open for allmenta etter utbygginga. SE ynskjer å regulera tilgangen. Det er naudsynt for å sikra tryggleiken og redusera slitasjen på området, meiner energiselskapet. Dessutan er vegen og tunnelane planlagt bygde som anleggsvegar, med den standarden og det tryggleiksnivået det inneber.
Også Hardanger og Voss Reinsdyrlag SA vil avgrensa tilgangen, og er uroa over auka ferdsle i området dersom vegen og tunnelen vert opna for alle.
Reinsdyrlaget understreka også at det er viktig å ta omsyn til rein i anleggsperioden, særleg i kalvingstida. Vidare har laget bedt om varsel dersom det vert observert rein i området i anleggstida. I ein kommentar til fråsegna skriv SE at selskapet vil imøtekoma ynsket.
Andre vilkår frå NVE er at utbyggjaren må orientera direktoratet før arbeidet startar og i kritiske fasar i prosjektet. SE må dessutan laga ein sluttrapport om miljø og landskap som dokumenterer at prosjektet er gjennomført i tråd med konsesjonen og dei godkjende planane.
Det er òg krav om dialog med reinsdyrlaget for å sikra at vegar i anleggsområdet ikkje hindrar reindrifta.
– Vil ha meir parkering
Damvegen Skogsveglag føreslo i høyringsrunden å etablera eit toalett og ein asfaltert parkeringsplass med plass til 50 bilar på masselageret i Hellersdalen, og å få på plass ei permanent telefonmast ved dammen. Ifylgje SE vert det allereie arbeidd med mobildekning i området, av omsyn til helse, miljø og tryggleik i byggje- og driftsfasen.
Elles skriv SE i ein kommentar til fråsegna at både asfaltering og toalettbygg er større tiltak som selskapet ikkje ynskjer å ta tak i. Om det kan avgrensast til eit grusa parkeringsareal, vil det ha lite å seia for prosjektet.
Også grunneigarane i Ytre Ålvik, som er organiserte gjennom Ytre Ålvik Skogsveglag og styret for hytta ved Dammen, ynskjer toalett. Grunneigarane ynskjer dessutan permanent tilgang til den nye vegen og tunnelen. Tilgangen for allmenta, derimot, bør ein vurdera å avgrensa, meiner dei. Grunneigarane ynskjer også å vera med på styra korleis tilgangen til området skal løysast, skriv dei i ei seks sider lang fråsegn.
I godkjenninga presiserer NVE at SE sitt ansvar er avgrensa til drifta av vassdragsanlegget, og ikkje omfattar bygging av offentleg infrastruktur som toalett og parkeringsplassar.
Ymist på ynskelista
Grunneigarane i Ytre Ålvik ottast miljøkonsekvensar av avrenning og ureining frå anleggsarbeidet. Grunneigarane er redde for at anleggsarbeidet vil gå ut over vassforsyninga, som i Ytre Ålvik er løyst med private brønnar. Nokre av dei er knytte til Bjølvo.
Grunneigarane har difor bedt om at vasskvaliteten vert overvaka, og at avrenninga frå anlegget vert leia andre stader. Dei ynskjer òg at dammen vert slik at vassleppet til Bjølvo kan kontrollerast i periodar for å sikra drikkevassforsyninga.
Dette vil SE ta omsyn til gjennom eit overvakingsprogram og miljøoppfølgingsplanar, skriv energiselskapet i eit svar. Selskapet opplyser òg at det er planlagt ekstra tappearrangement som kan sleppa vatn til Bjølvo.
Negative til fylling
Kvam Turlag og Bergen og Hordaland Turlag spurde i ei fråsegn kvifor SE ikkje vil bruka helikopter i staden for å laga veg.
Helikoptertransport er ikkje eit realistisk alternativ på grunn av høg kostnad, lengre byggjetid og uvisse om leveranse og kvalitet, meiner direktoratet. I ein kommentar til fråsegna opplyser SE at det hadde medført om lag 40.000 turar berre å få betongen til dammen frakta opp.
Turlaga er negative til fyllinga i Hellersdalen, og skildrar området som eit fint, lite dalføre der det attpåtil er påvist ein raudlista naturtype. Statkraft har kommentert at det ikkje er funne gode alternativ for tunnelmassane. Tilgjengeleg vegnett er ikkje dimensjonert for det.
NVE meiner at Statkraft har teke tilstrekkeleg omsyn til miljøet. Vegen er justert for å redusera inngrep i sårbare naturtypar, og det er lagt vekt på å påverka økosystemet minst mogeleg, skriv direktoratet i godkjenninga.
HF gjer merksam på at redaktør Sigbjørn Linga eig ein fritidsbustad ved Bjølsegrøvatnet. Red.
