Det vart ingen helsemerknad
Helse i Hardanger (HH) vart ikkje nemnt i revidert nasjonalbudsjett.
Slik vart det, trass stor tverrpolitisk innsats for i det minste å få med ein såkalla merknad om helsesatsinga i Kvam, opplyste ordførar Torgeir Næss (Ap) i heradsstyremøtet i Kvam 20. juni.
Ifylgje Næss er grunngjevinga at det er tette skott mellom staten og helseføretaka.
– Føretaka skal ikkje instruerast av staten, sa Næss.
Han viste til at lokalpolitikarane har argumentert med den sterke kritikken frå Riksrevisjonen mot den norske modellen for rehabiliteringstenester, men altså utan å nå fram.
– Det er peika på at helseføretaka har fått auka rammer og at det vert gjeve mogelegheit for såkalla samhandlingsmidlar, altså at kommunar i samråd med HH kan søkja Helse Vest om pengar til prosjekt, sa Næss.
Han stakk ikkje under stol at dette ikkje vil vera like bra som å koma inn i ordinært «løp», men at planen likevel er å prøva seg med ein søknad. Det er enno litt uvisst korleis detaljane i opplegget er, sa han. Vona er å få stønad til å driva HH i eitt eller to år, og så få tilbodet inn som del av det ordinære systemet.
– Det staten gjer, er å peika på kommunane. Me meiner dette er eit klart statleg ansvar, sa Næss
Han slo fast sat han er «ganske frustrert» over eiga regjering i saka.
Fredag 21. juni tok Næss saka opp i Hardangerrådet, slik han varsla heradsstyret om at han ville gjera. Han opplyser til HF at han fekk full støtte til ei fråsegn der rådet stiller seg bak ein eventuell søknad frå HH om samhandlingsmidlar.
