– Det var ganske kaotisk ein periode
Kvam brann og redning var fyrst ikkje budd på ein storbrann i bustaden i Norheimsund torsdag.
Årsaka er at brann- og redningstenesta fyrst vart beden om å yta bistand til politiet. Denne meldinga kom klokka 13.10, ni minutt etter at politiet fekk den fyrste meldinga om ei valdshending i bustaden.
Då hadde politiet væpna seg og rykt ut. Innsatsleiar Per Gunnar Thrane ved Kvam politistasjon opplyser at politiet vart møtt av mannen i huset utanfor bustaden. Då byrja det siva røyk frå huset, og snart var både svart røyk og flammar å sjå.
Kvinna som er sikta i saka for drapsforsøk, skadeverk og brannstifting, kom sjølv ut or bustaden etter at det byrja brenna. Ho var skadd, fortel Thrane.
Kaotisk situasjon
Klokka 13.24 vart det varsla om brann i huset. Då slo flammane allereie ut under mønet, og det var ein fullt utvikla brann i tre høgder, fortel brannsjef Torleif Ones i Kvam herad.
– Det eskalerte fort, seier Thrane.
– Då me var framme, var det veldig kaotisk ein periode, seier Ones.
Brannmannskap frå Omastrand, Ålvik og Samnanger vart tilkalla, i tillegg til styrkar sentralt i Kvam. På det mest hektiske var kring 25 personar i sving med å sløkkja brannen, noko som måtte gjerast utanfrå sidan han hadde kome så langt. Å ta seg inn i eller berga huset vart det aldri snakk om.
Parallelt med sløkkinga hjelpte mannskap til med å gjera det mogeleg for luftambulansen å landa på fylkesvegen, og å få den skadde kvinna om bord i helikopteret.
Ikkje forsvarleg
Litt før klokka 15 vart det meldt at brannen var under kontroll, og ein times tid seinare var han sløkt. Sidan venta oppgåver med sanering, opprydding og vakthald for Kvam brann og redning, fortel Ones.
– Det var ein ganske ordinær, men intens bygningsbrann, og me fekk seint varsel. Då me kom fram, var det ikkje folk inne i huset. Det ville ha vore uforsvarleg å senda mannskap inn, seier brannsjefen.
Huset vart totalskadd i brannen, men brannmannskapa lukkast med å hindra brannen i å spreia seg til ein carport med ein bil og eit anna bygg på tomta.
Ones seier at det vert opp til politiet å finna ut kva som er årsaka til brannen. Krimteknikarar kom til branntomta fredag ettermiddag.
