– Det var ei stygg ulukke her i sommar
Anne Grete Berge ynskjer 60-grense på strekkja frå Berge i Tørvikbygd til sentrum i bygda.
Det skriv ho i eit straumbrev til rådmannen i Kvam.
Grunnen er at trafikken her har auka monaleg. Berge har allereie snakka med Statens vegvesen om å utbetra avkøyrsla hennar. Ho er lovleg, men det kan gjerast forbetringar, og det vil Berge gjera.
Ho driv Berge Gard & Gartneri, og det gjer at det til tider fer ein del bilar ut og inn av tunet. Det er òg ei avkøyrsøe på den andre sida av vegen, mot Stekka.
Berge skriv at naboen hennar driv gard, og han opplever oftare og oftare svært farlege situasjonar i det daglege arbeidet. Bilistar køyrer ofte forbi på strekkja, og det manglar gangveg.
– Seinast i sommar var det ei stygg ulukke her, og det er ikkje fyrste gongen, skriv Berge.
Det er òg mange hjortepåkøyrslar på strekkja. Slik Berge ser det, er det mange gode argument for å setja ned fartsgrensa.
