— Det skal vera trygt og kjekt å trena
Treningssentera i Kvam gjer det dei kan for å leggja til rette for trygg trening.
Natt til torsdag tredde nye nasjonale smitteverntiltak i kraft. For treningssentera fører tiltaka til noko ekstra planlegging og organisering, men dei vil vera opne.
Eve Nelson Aksnes, dagleg leiar ved Hardanger Trening AS, fortel at lokalet over Spar-butikken i Norheimsund er godt eigna når dei nye retningslinene skal fylgjast. Senteret er romsleg og tilrettelagt for å kunna halda avstand, ifølgje Aksnes.
Den daglege leiaren fortel at det er gjeve informasjon til medlemane via sms, heimeside og Facebook.
— Me gjer det me kan for å leggja til rette for at det skal vera trygt og kjekt å trena, seier Aksnes.
— Flinke med avstand
Hildegunn Berge, dagleg leiar ved treningssenteret Attrå AS i Norheimsund, fortel at det vert nytta eit bookingsystem som gjev tilsette og medlemar oversikt over kor mange påmelde det er til timane. Eit liknande system vert nytta også av Hardanger Trening, ifylgje Aksnes. På båe sentera vert tal på plassar på gruppetimar reduserte.
Berge opplever at medlemane er flinke til å halda avstand. Ho oppmodar medlemane om å sjå seg om og fordela seg mellom dei to etasjane som kan nyttast.
— Me har god plass og gjer det me kan for at medlemane skal kunna trena som før. Dei skal ikkje måtta bli sitjande heime, seier Berge.
Stabile tal
Aksnes trur at pandemien har gjort det vanskeleg for enkelte å behalda motivasjonen og treningsrutinane.
— Me veit at det krevst litt jobb for å koma inn i gode vanar. Pandemien gjer det ikkje akkurat enklare å koma inn i og halda på desse, seier ho.
Sjølv om tal på medlemar lågare no enn før pandemien, fortel Aksnes at ho ikkje er bekymra. Det har vore stabile medlemstal på Hardanger Trening det siste året. Ifylgje Berge har medlemstalet hjå Attrå stige jamleg utover hausten.
— Me ligg kring det me hadde budsjettert med, seier ho.
Færre gruppetimar og rolegare tider er ikkje berre negativt. Aksnes fortel at fleire av instruktørane på senteret har fått høve til å oppdatera seg og ta kurs og utdanningar. Moglegheita til å ta utdanning på nett fører til at instruktørane slepp å bruka tid på reising. I tillegg vil dei ha høve til å gjennomføra planlagde timar.
