– Det skal vera skikkeleg arbeid
Sherpatrappene byrjar ta form i den nye traseen til Samlen i Herand. Seks karar frå Nepal står bak jobben.
Onsdag føremiddag legg HF sin utsending av stad for å møta dei arbeidsame karane frå Nepal. Bilen vert parkert i ei lomme ved Mælsvegen før ferda opp til sherpaene startar. Dei fyrste hundre metrane går innover i skogen. I eit kryss viser band i gult og svart vegen vidare. Banda er knytte med kort nok avstand til at journalisten klarar å koma seg oppover utan å gå for mykje feil.
Etter om lag ein kilometer kjem stadfestinga av at underteikna er på rett veg. Lydar av hamring på stein ljomar i skogen. Eit stykke lenger opp, i eit bratt parti, er det full aktivitet. Sherpaene jobbar to og to med kvar sine område. Delar av ei brei og solid steintrapp kjem til syne.
God teknikk og rett utstyr
Nima Nuru Sherpa er arbeidsleiar for sherpaene på staden. Dei er på oppdrag på vegner av Stibyggjaren AS. Sherpa er ein erfaren stibyggjar, og har vore med på nokre titals prosjekt i Noreg. Han fortel at starten har gått bra, og at gruppa ikkje har støytt på utfordringar så langt.
Ifylgje Sherpa er arbeidet med trappa opp mot Samlen mykje likt andre trappeprosjekt. Det same utstyret og dei same teknikkane vert nytta, forklarar han.
– Er det ikkje svært krevjande?
– Litt tungt er det, men så lenge me har ein god plan for kva me skal gjera, går det fint. Dessutan er det viktig å tenkja på teknikk. Då vert det mindre belasting, seier Sherpa.
– Ekstremt erfarne
Sherpaene kom til Herand fredag ettermiddag, og sette i gang arbeidet laurdag morgon. Då stod to av dei og pakka stein ved parkeringsplassen ved Mælsvegen, medan dei fire andre synfór området.
Arbeidsgruppa til Herand Idrettslag, som står bak initiativet, hadde på førehand laga fleire framlegg til kvar den nye traseen kan gå. Desse tok sherpaene utgangspunkt i då dei skulle ta den endelege avgjerda.
Sherpaene er opphavleg frå Nepal, og er i Noreg i periodar på maks seks månader. Før oppdraget i Herand har arbeidskarane arbeidd ved Romsdalseggen i Åndalsnes, og før der igjen ved Torghatten i Brønnøysund, opplyser Geirr Vetti, som er dagleg leiar i Stibyggjaren AS og ansvarleg for stivøla.
Ifylgje Vetti er sherpaene fjellklatrarar og ekstremt erfarne, så bratte stiar er ikkje noko problem for dei.
Sjå bilete og video frå stibygginga her:
Trapper som varar
Sherpa seier at både han og dei andre i gruppa er svært takksame for at dei får koma til Noreg for å jobba.
– Me får sett mange fine stader. Målet vårt er å laga trapper som varar i mange år. Det skal vera skikkeleg arbeid, seier han.
Sherpa meiner at trappene bidreg til at fleire kan ferdast i naturen, utan at han vert øydelagd. Dersom fleire går der trappa er, vil annan natur få vera i fred, påpeikar han.
Ventar meir stein
Førre veke vart 120 tonn stein frakta frå Solesnes til parkeringsområdet ved Mælsvegen. Ifylgje Christian Tolås, som både er engasjert i prosjektet og husar sherpaene, var det venta at meir stein skulle fraktast til området onsdag.
Tolås fortel at sherpaene skal vera i Herand to–tre veker i denne omgang.
