– Det sit langt inne å ta slike grep
Dei kommunale barnehagane i Kvam får reduserte opningstider frå og med 24. april.
Dei reduserte opningstidene vil vara ut barnehageåret, til og med fredag 7. juli, dersom det ikkje skjer endringar i bemanningssituasjonen i perioden. Det opplyser Kvam herad på nettsida måndag.
Bakgrunnen for kuttet er bemanningsvanskar og vikarmangel. Medan Norheimsund barnehage skal redusera opningstida med 45 minutt per dag, vil dei andre barnehagane ha ein reduksjon på 30 minutt.
Sjå oversikt over dei nye opningstidene her:
Saka har vorte drøfta av barnehagestyrarar, leiar for barnehage, oppvekstsjef og rådmann. Føremålet har vore å finna ei løysing der dei negative ringverknadene ikkje er for store, står det på nettsida.
– Det er difor vår vurdering at det er naudsynt å redusera opningstida for å vareta både borna sitt beste og dei tilsette, skriv rådmannen.
Dei nye opningstidene skal vera mindre reduserte enn det som tilsette og styrarar i barnehagane har meldt behov for. Det vert gjort for å sjå om ordninga gjev ynskt effekt, og om situasjonen vert betre, går det fram i skrivet som er sendt ut til alle føresette.
– Me har stor forståing for foreldre som får vanskar med redusert opningstid. Det sit langt inne å ta slike grep, står det.
