– Det nyttar ikkje å klaga over ting me ikkje kan gjera noko med

Edvard Skagen har vore leiar i velforeininga sidan april. Han kom frå vervet som nestleiar. Før han gjekk av med pensjon, jobba Skagen med sal og salsleiing.

– I store delar av livet har eg jobba for ulike verksemder i Orkla-konsernet. I åra før eg vart pensjonist jobba eg for Orkla Confectionary and Snacks. Mellom anna jobba eg med Sætre kjeks, snacks frå Kims og Nidar sjokolade, fortel han.

– Ein god stad

Skagen ønskjer at Kvamskogen skal vera ein god stad for folk i alle fasar av livet.

– Her skal det vera trygt og godt for oss som er pensjonistar, samstundes skal det vera nok aktivitetar til at born og tenåringar finn seg til rette, seier han.

– Er det noko konkret du ønskjer å ta tak i som leiar?

– Kvamskogen Vel må fokusera på det me kan gjera noko med. Det nyttar ikkje å klaga over ting me ikkje kan påverka. Eg trur samarbeid mellom oss og andre aktørar er viktig. Eg har inga tru på at frontar vil føra noko positivt med seg. Me må ha respekt for kvarandre, snakka godt saman og finna løysingar saman, seier han.

– Treng positivitet

Han ønskjer å skapa mest mogleg positivitet rundt Kvamskogen. Det vil han mellom anna oppnå ved å bruka nettsida til velforeininga og Facebook aktivt. Skagen arbeider til dømes med å fylla nettsida til vellaget med ein serie positive artiklar under fana «Kvamskogen i mitt hjerte».

– Det er artiklar som skal fokusera på alt det som er bra ved Kvamskogen. Så langt har me berre lagt ut éin artikkel, men me håpar å få eit heilt arkiv med positivitet. Me har eit unikt område her oppe. Det må me få fram, seier han.

Eit av måla med artikkelserien er å lokka fleire unge til å ta verv i velforeininga.

– Mange av styremedlemene i Kvamskogen Vel er over 70 år. Me har ei utfordring med å få yngre folk til å ta over. Dei unge har det travelt. Dei må både ta hand om krevjande jobbar og familien. Skal me rekruttera ungdomen, er positivitet heilt naudsynt, seier Skagen.

Ny handlingsplan

Styreleiarar vert valde for eitt år om gongen. Før Skagen leverer stafettpinnen vidare, håpar han at arbeidet med å laga ein ny, fireårig handlingsplan for foreininga skal vera godt i gang.

– Handlingsplanen me har hatt dei siste åra, skal reviderast neste år. Eg jobba mykje med visjonar då eg var yrkesaktiv. Eg veit kva gode visjonar kan gjera med ein organisasjon. Visjonane gjer at ein har noko felles å samla seg om, seier han.

Den nye handlingsplanen skal vera klar i 2024.