Det nye ferdigvarelageret til Lid Jarnindustri AS vert nok fullare enn dette når det er heilt ferdig. Prosjektleiar for bygget, Olav Lid (t.v.), og dagleg leiar Svein Ove Lid håpar likevel ikkje at det vert for fullt. – Det ville jo bety at me ikkje får selt varene våre, seier Olav Lid.

Det nærmar seg for nytt lager

Fabrikken til Lid Jarnindustri AS har vakse seg større og større dei siste åra. Eit nytt ferdigvarelager er det siste skotet på stamma.

Bård Valvatne
Journalist
Publisert Sist oppdatert

Det nye lagerbygget skal i hovudsak brukast til å lagra ferdige produkt som ventar på å bli frakta til kundane.

– Lagring har lenge vore ei utfordring. Me har ledige plassar inne i fabrikken til lagring, men det har etter kvart vorte svært trongt. Du kan nok seia at manglande lagringsplass har gjeve oss litt veksesmerter, seier dagleg leiar Svein Ove Lid.

Kva nybygget vil spara i kroner eller tid, kan han ikkje svara på.

Den siste døra inn til nybygget vart montert onsdag 3. april. Prosjektleiar for bygget, Olav Lid (t.v.), og dagleg leiar Svein Ove Lid står i døropninga like før monteringa.

– Men eg trur i alle fall at det nye lageret vil føra til at dei tilsette får ein enklare kvardag. Nybygget frigjer mykje plass i resten av anlegget vårt, seier Lid.

Det nye lageret kan også vera positivt for miljøet. Plassmangel har gjort at mange ferdige produkt har vorte pakka inn i kvit plast og lagra rundt fabrikken. Det er ikkje lenger naudsynt når det nye lageret er i drift.

– Dermed sparar me tid og pengar, og me reduserer plastbruken, seier Lid.

Arbeidet med det nye lagerbygget har gått etter planen.

– Litt står att

Arbeidet med lageret byrja i juni. Då HF vitja verksemda onsdag 3. april, skulle den siste døra inn til lagerbygget monterast seinare same dag. Det gjer at bygget kan lukkast og låsast.

Olav Lid er prosjektleiar for nybygget. Han fortel at sjølv om nokre varer allereie er flytta inn i det nye lageret, står det att ein del innreiingsarbeid. Verksemda reknar med at lageret vil vera heilt ferdig til fellesferien.

Dette biletet syner korleis Lid Jarnindustri AS såg ut i 1962.

Fabrikken har dei siste tiåra esa kraftig ut. Det nye bygget er nesten 3.300 kvadratmeter stort. Prisen vil truleg bikka 30 millionar kroner. Nybygget vil gjera at fabrikken til verksemda til saman vert 13.500 kvadratmeter.

– Eg trur anlegget er bygd ut i 19 omgangar. Me byrjar etter kvart å fylla opp heile industriområdet me ligg på. Anlegget kan ikkje verta mykje større enn det er i dag, seier Olav Lid.

Produksjonen til Lid Jarnindustri AS startar i hallane til høgre i biletet. Så vert produkta meir og meir ferdige på veg mot den venstre sida av anlegget. Produkta skal enda i det nye ferdigvarelageret, som ligg lengst til venstre.

Fekk tunnelkrøll

Planane om å laga tunnel under Kvamskogen skapte litt startvanskar for det nye lageret. Å få dei naudsynte løyva var ikkje enkelt.

– Tunnelen gjorde at fylket bandla heile området. Det skulle brukast som riggplass for tunnelen, fortel Olav Lid.

Lid og Lid takkar lokale politikarar, og særleg varaordførar Frode Nygård, for at problema til slutt løyste seg.

– Nygård har vore i kontakt med fylketskommunen og snakka for saka vår, seier Olav Lid.

– Problema gjorde at me nesten la heile lageret på is. Så tok Nygård kontakt og oppmoda oss om å søkja på nytt. Han lova å gjera det han kunne for å hjelpa. Heldigvis løyste det seg, seier Svein Ove Lid.

Vintervedlikehald og vedproduksjon

Produkta til Lid Jarnindustri vert selde under varemerket Dalen. Verksemda lagar utstyr til brøyting og anna vintervedlikehald av veg. Den lagar også maskinar som vert brukte til vedproduksjon. Høge straumprisar har ført til at det siste segmentet har vakse seg større og større dei siste åra, fortel Svein Ove Lid.

Nokre produkt, som desse sandstrøarane, er allereie flytta inn i lageret.

Om lag 13 prosent av snøfresarane Lid Jarnindustri lagar, vert eksporterte.

– Me har kundar i USA, England, på Island og i landa rundt Alpane, seier Svein Ove Lid.

Verksemda har 70 tilsette. Den omsette for 153 millionar kroner i fjor.

steinsdalen nyhende lid jarnindustri as industri økonomi
Laga med Labrador CMS