Det kvite teppet
Vindstille og låg sol medverka til skodda som prega Hardanger mot slutten av førre veke.
Heldt du deg nede ved fjorden, såg du kanskje knapt bort til grannen. Kom du deg opp i høgda, kunne du nyta solskin frå skyfri himmel.
Med eit kjapt googlesøk er det snart gjort å dra konklusjonen om at det var såkalla strålingståke som i fleire dagar fylte Hardangerfjorden, særleg fredag og laurdag.
Men, seier vakthavande meteorolog Haldis Berge ved Vêrvarslinga på Vestlandet, denne gongen var det ein miks av strålingståke og havtåke – ei form for adveksjonståke – som hadde trekt innover til kysten og i fjordane.
– Kva er det som skjer?
– Fuktige luftstraumar vert avkjølte over fjordane og havet og dannar tåke. Denne gongen gjekk ho veldig langt inn i fjordane. Det skjer, det òg, men tåka er vanlegast langs kysten.
– Tåka vart liggjande lenge ut på dagen? Kvifor var ho så «seig»?
– Når det er lite nok vind og ikkje særleg omrøring i luftlaget, kan ho liggja lenge. For ein månad sidan, då sola stod høgare, ville tåka ha løyst seg opp kjappare. Når det fyrst sprekk opp, går det som regel fort, seier Berge.
Tåkeelskarar kan fordjupa seg i fleire bilete her:
