– Det kom som eit lite sjokk

Utekontakten i Kvam har 1,5 årsverk. Då Schelin byrja i ei halv stilling i august, var ho ikkje klar over at Siriann Lillevik nokre månader seinare skulle søkja om permisjon i eitt år for å verta dagleg leiar i Grannehjelpa. Frå 1. mars vart stillinga til Schelin utvida til ei fulltidsstilling.

Ho hadde jobba fulltid i nesten to månader då HF snakka med henne i slutten av april.

– Det kom som eit lite sjokk då Siriann slutta og eg plutseleg var utekontakt på heiltid. Med ei fulltidsstilling kom det nokre nye arbeidsoppgåver. Alt nytt er litt skummelt. Det har vore nokre utfordringar, men samstundes har det vore veldig kjekt. Eg kosar meg kvar dag, og trur aldri eg har ledd så mykje på jobb før, fortel ho.

Røter i Ålvik

Schelin, som bur på Kjepso, er fødd og oppvaksen i Norrköping i Sverige. Då ho flytta til Ålvik i 2015 for å byrja i sommarjobb på Elkem Bjølvefossen AS, var ikkje industribygda ein ukjend stad.

– Pappa og farmor er frå Ålvik. Me vitja ofte Ålvik om somrane. Medan eg hadde sommarjobb på Bjølvefossen, møtte eg kjærleiken. Dermed vart eg verande i Ålvik, fortel ho.

Schelin budde ein periode i Fredrikstad, der ho tok ei bachelorgrad i psykologisk helsearbeid, før ho flytta attende til Ålvik.

Då ho såg at det var ei ledig deltidsstilling i utekontakten, søkte ho og fekk napp.

– Eg søkte fordi jobben er veldig relevant i forhold til utdanninga mi, og fordi eg brenn for å jobba med førebyggjande psykisk helsearbeid. Skal ein førebyggja, er det ungdomen ein må jobba med. Då kan ein ta tak i ting før det går gale, seier ho.

Ungdomsbase vart båtbase

Schelin fortel at ein utekontakt skal vera til stades der dei unge er.

– Utekontakten skal vera ein trygg vaksen dei unge kan snakka med. Me skal på ein måte vera ein vaksen ven. Sidan me har teieplikt, kan dei unge snakka med oss om alt, fortel ho.

Ei av oppgåvene til utekontakten er å driva Ungdomsbasen. Basen, som skal vera ein uformell møteplass for ungdom mellom 13 og 20 år, held vanlegvis til i kjellaren i Ungdomshallen i Norheimsund. Fram til sommaren skal basen vera på Hardanger fartøyvernsenter. Den er mellombels døypt om til Båtbasen.

Ifølgje Schelin er båtbasedeltakarane delte i tre grupper. Ei gruppe skal restaurera ein gammal trebåt, ei gruppe skal skapa god stemning, mellom anna ved å servera mat, og den tredje gruppa skal promotera Båtbasen i sosiale medium.

Fartøyvernsenteret tok initiativ til Båtbasen. Som takk for hjelpa får Ungdomsbasen lov til å bruka båten når den er ferdig restaurert.