– Det kjem framleis turistar
Turistinformasjonen ved Steinsdalsfossen opna 1. mai. Bygget har ikkje vore så folketomt som ein kunne frykta.
– I helga var det bra. Eg vart nesten litt overraska. Det var mellom 150 og 200 personar innom kvar dag, fortel Børge Nordlinder Nitter.
Han er dagleg leiar i Nitter Nordlinder AS, som overtok drifta av turistinformasjonen i Kvam i fjor etter å ha vunne kampen om oppdraget mot Kvam Næringsråd.
Alle som var innom, var nordmenn. Nitter fortel at turistinformasjonen førebur seg på at dei norske turistane vil dominera i år.
– Me legg ut flest brosjyrar på norsk. Når ting byrjar opna opp att, vil me freista finna gode besøksalternativ for nordmenn, og kanskje særleg nordmenn med born. Hardangerbadet og Hardanger fartøyvernsenter vert viktige. Me håpar begge opnar att i løpet av sommaren. I tillegg har me gullfiskvatnet og sjølvsagt Steinsdalsfossen, seier han.
I skrivande stund er det usikkert når Hardangerbadet og Hardanger fartøyvernsenter tek imot gjester att. Hotellet i Øystese skal etter planen opna 5. juni.
Færre enn i fjor
Det er installert ein personteljar ved Steinsdalsfossen. I april i fjor vitja 7.072 personar fossen. I år var talet om lag 1.718. Likevel håpar og trur Nitter at sommaren kan verta ganske bra.
– Hardanger har mykje å tilby norske turistar. Sidan me ikkje kan reisa til utlandet, vil nok mange reisa i Noreg. Eg har allereie snakka med bubilturistar som fortalde at dei hadde kjøpt bubil i år sidan dei ikkje kunne reisa til utlandet, seier Nitter.
Dersom campingturistane spør kvar dei kan overnatta i Kvam, sender Nitter dei vidare til campingplassane eller til kaien i Øystese.
– Det siste eg har høyrt frå Kvam herad, er at campingplassane tek imot bubilar og campingvogner, men at dei må bruka eigne bad og toalett, seier han.
Ventar i Jondal
Turistinformasjonen i Jondal skulle opna 1. mai. Det vart det ikkje noko av fortel Åsmund Bakke, dagleg leiar i Folgefonna Ecotourism AS.
– Me er i dialog med oppdragsgjevaren vår, Ullensvang kommune, om når me kan opna. Den siste avtalen er at me i alle fall ikkje opnar før 1. juni. Når me opnar, må det både vera trygt for dei tilsette og vera behov for ein turistinformasjon. Ingenting tyder på at det er eit slikt behov i dag. Me er tilgjengelege på telefon og e-post for dei som treng oss, seier han.
Bakke er også dagleg leiar i Folgefonni Breførarlag AS, som gaidar turistar på isbreen Folgefonna. Breførarlaget har lagt alle aktivitetar på is, for å bruka eit høveleg uttrykk, inntil vidare.
– Sesongen til breførarlaget plar byrja i mars. Alt er i alle fall avlyst fram til 1. juni. Kva som skjer med resten av sesongen, kjem an på styresmaktene og utviklinga til pandemien. Truleg vert det høve til å arrangera turar for mindre grupper med private gaidar, seier Bakke.
Trur ikkje på toppsesong
Bakke er ikkje tvil i at det er norske turistar som gjeld i år. Han trur mange bergensarar og vestlendingar i år kjem til å oppdaga nærområda på nytt i år. Desse kan likevel ikkje erstatta alle dei utanlandske turistane.
– Eg trur alle reiselivsverksemdene i Jondal vil få redusert omsetning. Me som driv med reiseliv, må sjå på korleis me kan overleva utan å bidra til smittespreiing. Her kvilar eit stort ansvar på reiselivsnæringa. Det er viktig å reisa og ha det kjekt på fritida, men det er viktigare at folk er friske og at samfunnet fungerer, seier han.
