— Det kan vera gjort feil

Klagane på eigedomsskattetakstane strøymer i desse dagar inn til Kvam herad, vekevis før klagefristen 12. april. Krava om betaling, derimot, er allereie sende ut.

I formannskapsmøtet onsdag måtte rådmannen, med assistanse frå sakkunnig nemnd, gjera greie for nokre av prinsippa som ligg til grunn for takstane, etter at Sp hadde stilt fleire spørsmål om takstgrunnlaget.

Tre soner

Ho opplyste mellom anna at bustadene i heradet er delte i tre soner:

• Eigedomar i områda kring Norheimsund og Øystese ligg i sone 1 og har ikkje fått frådrag i taksten på grunn av plassering.

• Eigedomar i Ålvik og på Mundheim har fått eit frådrag i taksten på 20 prosent.

• Eigedomar i resten av Kvam har fått eit frådrag på 10 prosent.

Prisen per rutemeter husvære er heva frå 10.000 til 23.000 kroner sidan førre taksering. Verdien av kvar rutemeter fritidsbustad er dobla frå 10.000 til 20.000 kroner. Bustad- og våningshus er sette opp i takstverdi frå 10.000 til 15.000 kroner per rutemeter.

Landbruks- og fritidseigedomar er verdsette likt overalt, men hyttetakstane på Hamlagrø og i Fitjadalen er lågare enn på Kvamskogen og Haukås, ifylgje rådmannen.

— Kan finnast feil

Hesthamar gjorde det klart at det kan førekoma feil, mellom anna i samband med spesielle eigedomar som det er vanskeleg å taksera. Hennar råd er altså å klaga, noko mange altså allereie har gjort.

Jostein Ljones (Sp) sa at politikarane får mange førespurnader om skatten for tida. Han stilte spørsmål om kva som ligg bak når ein eigedom har fått ein auke på 60—70 prosent sidan førre taksering.

— Kva har skjedd i marknaden? Slike ting reagerer ein på. Det har ikkje vore ein generell prisvekst som tilseier ein slik auke, sa han.

— Subjektiv oppfatning

Varaordførar Frode Nygård (Frp) sa at situasjonen er resultatet Frp frykta då partiet tidlegare røysta mot ny taksering. Han meiner ein burde ha nytta matrikkelen til å justera takstane. Han har ei kjensle av at den subjektive oppfatninga til takstpersonen er avgjerande for kva taksten vert.

— Det slår uheldig ut. Hus som ikkje er gjort noko med på ti år, har fått ein vesentleg auke i indre verdi. Spør ein om grunnlaget for taksten, får ein ikkje svar. At ein må etterlysa vedtaket om taksten, gjer at mange møter veggen, sa Nygård.

Han hadde sjølv bede om å få grunnlaget for taksten, utan å få svar. Måndag hadde han fått takstskjemaet og endåtil bilete av eigedomen sin, men hadde ikkje rokke å studera det. Nygård meiner skattytarane må få tilgang til eit grunngjeve vedtak frå sakkunnig nemnd.

Bladfyken bad sjølv om takstgrunnlaget for sine eigedomar onsdag, og fekk raskt tilsendt takstskjemaet, men ikkje noko anna.

— Du skal få tilsendt klagegrunnlaget når du etterlyser det, forsikra rådmannen formannskapet om.

Ifylgje henne kan det oppstå kapasitetsutfordringar om mange etterlyser dokumentasjonen. Folk vil få utsett klagefristen om dei får for knapp tid, opplyste ho.

— I prinsippet likt

Rådmannen opplyste at alle eigedomar er takserte, bortsett frå produksjonsdelen av kraftanlegg. Sakkunnig nemnd møttest for fyrste gong i mai i fjor og laga eit utkast til rammer og retningsliner. I alt har nemnda hatt 11 møte, og føringane er justerte noko undervegs. Retningslinene kan ein finna på den kommunale heimesida.

Ifølgje rådmannen vert sjablongar nytta som grunnlag for taksering av nær alle bygg, men nemnda har freista retta opp i tilfelle der taksten openbert er feil.

Omsetning av eigedomar i ulik delar av heradet er nytta som samanlikningsgrunnlag. Prinsippet om lik handsaming av alle har lege til grunn, ifylgje rådmannen.

— Ein snakkis

Styreleiar Eva Grimstad i Kvamskogen Vel seier eigedomsskatten er mykje diskutert på Kvamskogen etter at dei nye takstane vart kjende. Utfordringa er at kvar enkelt berre har tilgang til eigen takstsetel.

Ho opplyser at vellaget difor har bede Kvam herad om eit oversyn over auken i eigedomsskatt for hyttene på Kvamskogen. I tillegg ynskjer laget å vita kor mykje Kvam herad samla får inn i eigedomsskatt for eigedomar i området.

— Mange meiner me får for lite att for eigedomsskatten, seier ho.