– Det har vorte lettare å forstå dataverda

Då Torgeir Magnar Børve onsdag møtte fylkesmannen i Oslo og Viken, kvemming Valgerd Svarstad Haugland, til eit nytt såkalla Tematreff i Torefjell, var Erna Tveitnes ein av dei som hadde benkja seg framfor datamaskinen for å delta på det digitale møtet.

Det har vore arrangert tematreff kvar onsdag sidan midten av oktober. Tveitnes fortel at ho har vore med på alle, bortsett frå dei to første. Det skuldast at namnet på treffa fekk henne til å stussa.

– Skal dei arrangera treff for seniorar på Torefjell klokka seks om ettermiddagen? tenkte eg. Eg måtte summa meg litt før eg skjøna kva dette var, fortel ho.

Møta går føre seg på den digitale plattforma Whereby. Årsaka til det uvanlege namnet er at i Whereby møtest deltakarane i digitale møterom. Desse er kalla opp etter lokale fjell. Møterommet som vert brukt til tematreffa, heiter Torefjell.

– Det har fungert

Tematreffa er ein del av prosjektet Fellesskap for framtida. Målet er å få fleire over 60 til å vera sosiale via Internett. Tveitnes fortel at for hennar del har prosjektet fungert som det skulle.

– Om nokon for eit år sidan hadde sagt at eg skulle møta nokon i eit digitalt rom, hadde eg ikkje skjøna kva dei snakka om. Etter at eg har brukt dette ei stund, er det mykje lettare å forstå dataverda. Eg hadde nok ikkje teke initiativ til å prøva dersom det ikkje var for koronaviruset, seier ho.

Tveitnes seier at sjølv om ho har brukt datamaskinar i mange år, har ho ikkje brukt Whereby eller liknande plattformer tidlegare. Ho trur ikkje ho kjem til å slutta å bruka denne typen verktøy når pandemien er slutt.

– Det høyrest kanskje rart ut, men eg tykkjer dette er veldig sosialt. Det har vorte ein del av kvardagen min, sjølv om denne typen teknologi ikkje kan erstatta det å møtast ansikt til ansikt, seier ho.

Held fram til neste år

Bak Fellesskap for framtida står Grannehjelpa, Kvam herad og Kvam folkebibliotek. Dagleg leiar i Grannehjelpa, Sidsel Haugen, fortel at før onsdagens digitale møte med Haugland, har treffa innehalde både bokpresentasjonar, føredrag om søvnlidingar, trim, quiz og mykje anna. Dei fleste treffa har hatt fleire enn tjue deltakarar. Det mest populære møtet var eit møte med skodespelar Frank Kjosås, der 36 deltok.

– Men det er vanskeleg å seia nøyaktig kor mange som har fått dei digitale møta med seg, fordi det truleg er fleire som ser på mange av skjermane, seier Haugen.

Prosjektet har fått pengar frå Helsedirektoratet. Frå nyttår er det slutt på pengane. Det betyr ikkje at det er slutt på treffa i Torefjell. Planen er å ha nye tematreff kvar veke i 2021. Sjølv om koronavaksinane tek knekken på pandemien, er planen at møta skal halda fram.

– Det er trass alt ikkje berre viruset som gjer det vanskeleg for nokre å gå ut på arrangement. Alt frå sjukdom til glatt føre kan gjera at folk ønskjer å vera heime i periodar. På mange måtar har viruset hjelpt oss til å finna ein møteplass som er tilgjengeleg for nesten alle, seier Haugen.

– Enkel å bruka

Tematreffa er gratis og plattforma Whereby skal vera enkel å bruka. Dei som vil delta på møta, treng berre å følgja ei lenke. Whereby kan brukast både på mobiltelefon, nettbrett og datamaskinar. Brukarane bestemmer sjølve om dei vil vera anonyme eller ikkje. Det er frivillig om ein vil vera aktiv og delta i samtalen, eller berre lytta til det som skjer.

Dei som er usikre på korleis dei skal bruka Whereby, kan ta kontakt med Grannehjelpa for å få instruksjonar.

Haugen fortel at det òg er mogleg å gje Tematreff på Torefjell i julegåve.

– Dersom nokon kjenner ein eldre person dette passar godt for, kan dei få eit gratis gåvekort og ein brosjyre hos Grannehjelpa og gje denne personen opplæring i å bruka Whereby, seier Haugen.