– Det har gått akkurat som me håpa

Under siderfestivalen inviterte Eldhuset gardsrestaurant til «Sider og mat i harmoni» både fredag og laurdag. Arrangementet omfatta ein firerettars middag servert med Spildegarden sine eigne sidrar. Fredag var det nesten fullt, og laurdag var det heilt fullt.

Konseptet handlar ifølgje Larsen, som gjerne kallar seg eplebudeie, ikkje berre om mat og sider, men i like stor grad om å gje gjestene ei oppleving.

– Me prøver å servera maten og drikka saman med historier om Spildegarden, eldhuset og råvarene gjestene får servert, fortel ho.

– Det skal ikkje berre vera eit måltid, men ei totaloppleving. I eit så intimt lokale vert folk på ein måte tvinga til å vera litt sosiale med framande, fortel eplebonde Geir Henning Spilde.

– Svært kortreist

Spilde og Larsen prøver å bruka så mykje eigne råvarer som mogleg. Treng dei noko dei ikkje produserer sjølv, prøver dei å finna det hos andre lokale produsentar. Først om dei ikkje finn det dei treng i regionen, kjøper dei mat frå andre delar av landet.

Sjølve eldhuset har plass til 28 gjester, men gardsrestauranten kan ta imot om lag hundre dersom uteområdet vert teke i bruk.

Sidan starten har gardsrestauranten vore open dagleg om sommaren. Då kan gjestene stikka innom og eta lunsj utan å tinga på førehand. Denne hausten vert det lunsjservering kvar laurdag, så lenge det er marknad for det.

Restauranten tek imot bestillingar på middagsopplevingar lik den under siderfestivalen heile året. Dei som ønskjer middag, må bestilla og vera minst ti personar.

I tillegg tilbyr restauranten sidersmaking for grupper med turistar.

God start

Gardsrestauranten vart opna for å gje Spildegarden fleire bein å stå på. Den serverte dei første gjestene i mai 2021. Det var framleis pandemi, og nordmenn vart oppmoda om å feriera i heimlandet. Vestlandet vart ein vinnar både når det galdt vêret og talet på turistar. Det merka dei på gardsrestauranten.

– Det rann inn folk. Me fekk ein skikkeleg pangstart. Det var så stor pågang at me måtte setja opp eit skilt ved innkøyrsla der det stod «vent her på servitøren», fortel Spilde.

– Mange av gjestene var nordmenn som plar reisa på vintur til utlandet, men som dette året i staden reiste på sidertur til Hardanger, fortel Larsen.

Den gode sommaren kom godt med. Pandemien gjekk hardt ut over restaurantnæringa, og restaurantar er mellom dei viktigaste kundane til Spildegarden.

Sommaren 2022 vart rolegare.

– Truleg fordi grensene vart opna og nordmenn forsvann til utlandet, samstundes som utlendingane ikkje i like stor grad kom til Noreg. I år har utlendingane kome attende for fullt. Økonomisk var sommaren i år betre enn i 2021, seier Spilde.

Leitar etter kokk

For tida driv Spilde og Larsen restauranten sjølv, med litt hjelp frå slekt og vener. Han fungerer som kjøkensjef, medan ho fungerer som restaurantsjef og pommelier.

Frå mai til desember i 2021 hadde gardsrestauranten eigen kokk. Sidan har Spilde og Larsen leita etter ein ny kokk. Det har vist seg å vera vanskeleg. Årsaka er kokkemangel, ettersom mange kokkar fann seg andre jobbar under pandemien.

– Me driv med omfattande siderproduksjon i tillegg til gardsrestauranten. Det er ei grense for kva me har tid til, seier Spilde.

– Me har halde att på marknadsføringa av restauranten fordi me treng tid til å produsera sider. Først om me får ein ny kokk, kan me for alvor gje gass, seier Larsen.