– Det handlar om tryggleik

– Eg kjenner meg mykje tryggare allereie.

Det seier Alton Beer. Torsdag var han ein av fire som var med på symjetrening arrangert av Kristent Interkulturelt Arbeid (KIA) i Hardangerbadet.

Beer bur i Øystese, og har både fjord, strand og basseng i nærleiken, men det har ikkje vorte brukt fram til no. Ikkje alle som flyttar til Noreg, kjem frå eit land med strender, seier han. Beer kan ikkje symja, og vatn har han hatt vonde opplevingar med. Å få høve til å læra seg å symja betyr mykje.

– Eg har born som likar å bada, og då må eg koma meg ut av komfortsona. Eg må berre få det til, seier han.

– Finst ikkje tilbod

Symjetreninga gjekk stort sett fint, synest Beer. Han hadde det kjekt. Også resten av badegjengen var glade etter dukkertar og diverse øvingar i bassenget. Frå land fylgde Tor Håkon Berge med på treninga. Han er tilsett i KIA, og brenn for å få tilbodet ut til fleire.

Berge har vorte godt kjend med mange innvandrarar gjennom ulike prosjekt i organisasjonen. Fleire har fortalt om manglande symjeopplæring i heimlandet. I tillegg har mange kome til Europa som båtflyktningar. Det har ført til traume og vasskrekk.

Initiativet tok Berge for kring eitt år sidan.

– Det finst ikkje noko tilbod om å læra det, seier Berge.

Berge kontakta både Vaksenopplæringa, Kvam herad og Nav for å høyra om det var råd å få til noko, men ingen av dei hadde pengar eller ville ta ansvar for det. Då Berge kom i kontakt med Hardangerbadet, ordna det seg. I alle fall for ei stund.

– Nølte ikkje

– Hardangerbadet var veldig «på» med ein gong. Anita (Storemark, dagleg leiar, journ. merknad) var med med det same, fortel Berge.

Prosjektet er ikkje evigvarande, men Berge får brukt litt av budsjettet til KIA si «mannsgruppe». Pengane held til åtte treningar for åtte personar. Interessa har vore stor, fortel han.

Dag Instanes, som har ansvar for symjetreningane, er idrettspedagog i Hardangerbadet.

– Kva lærer du deltakarane?

– Eg lærer dei no i starten å liggja vassrett i vatnet. Når ein sym, går ofte beina nedover i starten. Difor har me øvd på å sparka frå i kanten og koma oss bortover vassrett, seier Instanes.

Han fortel at karane også fekk øva på å ha hovudet under vatn. Instanes tykte treninga var bra. Det gjekk over all forventning, seier han.

– Alle har ulike utfordringar, og det er kjekt å jobba med.

Handlar om tryggleik

– Det handlar om tryggleik. Å kunna vera med i båt, bada i fjorden og slikt. Mange har ei frykt for vatn og held seg vekke frå det. Det kan vera vanskeleg, i alle fall som småbarnsfar, seier Berge.

Det same prosjektet er starta opp på AdO Arena i Bergen. Bergen kommune stilte opp med det same, fortel han. Kommunen betalar deltakaravgifta.

– Kva er målet?

– Målet er at alle vaksne innvandrar som treng det, får symjeopplæring. No fell dei mellom alle stolar, og mange endar med å ikkje læra det. Vaksenopplæringa skulle ha teke tak i det. Symjing går jo inn i skulen elles, seier Berge.

Sjølv om det førebels berre er eit tilbod for menn, er behovet minst like stort hjå kvinner med innvandrarbakgrunn, fortel han. Fleire har allereie meldt interesse.

Grunnen til at det ikkje er eit tilbod for kvinner i dag, er at pengane kjem frå budsjettet til mannsgruppa. Berge seier at det er enklare for mange deltakarar å fordela seg i grupper som menn og kvinner. Eit mål er å starta symjeopplæring også for dei.

Ser ein skilnad

– Å tileigna seg gode symje- og livredningsferdigheiter tidleg, og å kunna vurdera risiko i samband med vassaktivitetar, er heilt avgjerande for å koma nærare visjonen om at ingen skal drukna.

Det seier Tanja Krangnes, fagsjef for drukningsførebygging i Redningsselskapet. Ho fortel at Redningsselskapet saman med Norges Svømmeforbund har gjort ein del undersøkingar av symjeferdigheiter hjå tiåringar. Undersøkingane viser ein skilnad mellom born med etnisk norske foreldre og born med minoritetsforeldre.

– Ikkje alle land har same kulturen for vatn og symjing, seier Krangnes.

Drukningsulukker der innvandrarar er innblanda, finst det altfor lite informasjon om, seier ho. Redningsselskapet har ført statistikk over drukningsulukker sidan 2017. Spesielt dei fyrste åra, når det galdt badeulukker med barn og unge, var born med minoritetsbakgrunn overrepresenterte, opplyser Krangnes.

– Sosioøkonomiske forhold spelar òg inn. Alle har ikkje råd til å gå på symjeskule. God opplæring i skulen er ekstremt viktig, seier Krangnes.