– Det er mykje kokain på festar i Kvam

Ungdommar ned i 9. klasse har testa narkotikaen i sommar, fortel Siriann Lillevik ifylgje rådmannen. Ungdomane fortel òg at det er mykje og lett tilgjengeleg kokain på fest.

Det var Kvam KrF som spurde rådmannen om korleis Kvam herad har tenkt å setja rusreforma ut i livet. Heradet vil få nye oppgåver med førebygging for og oppfylging av personar som vert tekne med narkotika. Oma spurde òg om russituasjonen i Kvam.

Heradet har enno ikkje fått oppdraget, svara rådmann Anita Hesthamar i heradsstyremøtet 27. september. Rådmannen ser føre seg at avdeling for rus og psykiatri (ROP) får hovudansvaret for reforma, men at det truleg vil verta trong for eit tverrfagleg samarbeid, særleg med oppveksteininga. Det gjeld særskilt sidan reforma gjeld born ned til 14 år.

ROP vil kunna gje informasjon om risiko og moglege konsekvensar av narkotikamisbruk. Avdelinga kan visa veg vidare i hjelpeapparatet og gje råd om oppfylging innan rusbehandling.

Når det gjeld situasjonen i Kvam, har Utekontakten fylgjande tilbakemelding:

• Rusbruk vert normalisert gjennom musikk, tv, filmar, politikk og sosiale medium.

• Sal av rusmiddel skjer i sosiale medium.

• Ungdata-undersøkinga frå 2021 viser at ungdomane har låg debutalder for alkohol samanlikna med liknande kommunar. På slutten av ungdomsskulen har 1 av 4 av ungdomane vore vesentleg rusa.

• Fleire ungdomar enn tidlegare melder tilbake at dei har fått tilbod om cannabis.

• Bruken av cannabis har auka det siste halvåret. Ungdomar har opplyst at ungdomar i 9. klasse har prøvd cannabis i sommar.

• Kokain er lett tilgjengeleg på fest.

Utekontakten meiner at førebyggjande arbeid må halda fram med mellom anna gode fritidsarenaer, informasjon, oppsøkjande arbeid, samtalar med skulehelsetenesta og synleg politi.

Rådmannen minner om ordtaket om at det trengst ein heil landsby for å oppdra eit barn.