– Det er inga skrivebordsstilling

700.000 kroner i året vil stillinga medføra i kostnad. Et fleirtal på 20 mot 13 i Ullensvang kommunestyre lytta 29. mars til rådmannen og sette av pengar til henne.

Rådmann Ole-Jørgen Jondahl fekk fleire kritiske spørsmål om kva den tilsette eigentleg skal driva med. Han avviste at det er snakk om ei form for skrivebordsstilling, slik ordskiftet kunne tilseia at særleg Sp trudde.

Einskapleg system

Vona til rådmannen er å få på plass eit godt system for einskapleg handtering av basseng og praktisk arbeid knytt til dei, mellom anna med å skaffa badevakter med livredningskompetanse. Dessutan kan det vera aktuelt å få til ny aktivitet knytt til bada, og arbeid med mellom anna utvikling av folkebadet i Odda er i vente. Han meiner rektorane, som fleire stader har hatt ansvaret for organisering av bassengaktivitet, bør få bruka tida si på anna arbeid.

– Dei skal driva skulen og vera opptekne av læringa til elevane. Dei skal ikkje ha noko med bading å gjera. Andre skal gjera det, sa rådmannen.

Jondahl viste til ulukka i Modalen der ein 15-åring døydde åleine i eit offentleg basseng nyleg. Noko slikt skal ikkje skje i Ullensvang, understreka rådmannen. Rutinar og system som sikrar mellom anna tryggleiken, skal vere på plass, sa han.

– Når det er offentleg bading, kan me stå rette i ryggen den dagen det skjer noko og visa til at me hadde redusert risikoen så godt me kunne. Det kan skje ting sjølv om ein har aldri så gode rutinar, sa han.

Ville utsetja saka

Håkon Kvammen (KrF) tok til orde for å utsetja saka til 2024-budsjettet, men det fall med 19 mot 14 røyster.

Kvammen reknar med at kommunen har hatt forsvarleg drift av bassenga fram til no, og at det allereie finst rutinar for drifta. Han sette dessutan spørjeteikn ved at saka ikkje vart teken opp i budsjettsamanheng, og heller ikkje i formannskapet. Dessutan meiner han saksutgreiinga er vel kortfatta. Behova er for dårleg dokumenterte og fylgjene for dårleg utgreidde, synest Kvammen.

Han viste til at andre verksemder i kommunen gjerne skulle hatt fleire stillingar.

Hildegunn Espe (Sp) gav Kvammen støtte. Ho meiner stillinga ser ut til å vera «rein administrering» utan praktiske oppgåver knytt til den tekniske bassengdrifta. Ho meiner det ikkje er ei stor sak å halda orden på seks basseng, og at ein må sjå etter andre løysingar. Til dømes kan idrettslag hjelpa til, meiner ho.

Jørund Kvestad (Sp) meiner ein bør vurdera å plassera oppgåvene hjå eksisterande tilsette, anten det er rektor eller den nyleg tilsette rådgjevaren for friluftsliv og idrett. Lars O. Seim (Sp) meiner det er eit paradoks at kommunesamanslåinga skulle effektivisera drifta, medan ein i denne saka opprettar ei ny stilling fordi «me har oppdaga at me har så mange basseng».

– Ei snodig og dårleg sak, sa han.

Per Helge Sekse (Sp) minte om at nedbemanning vart drøfta for ikkje lenge sidan, og åtvara mot «jojodrift».

– For fordelt?

Jarle Vangen (Ap) meiner det er ein risiko for at ansvaret i dag er fordelt på for mange personar. Han meiner stillinga trengst for å sikra eit godt tilbod og god sørvis til innbyggjarane.

Elin Eide Brattabø (H) spurde kvifor det trengst ei leiarstilling til føremålet, og etterlyste signal om trongen for stillinga då badetilbodet vart drøfta tidlegare i vinter.

Erlend Nævdal Bolstad (H) sa at H generelt er skeptisk til nye stillingar, men minte om ansvaret for tryggleik i bassenga.

– Er tryggleiken vareteken? Driv me i tråd med lova i dag? spurde han.

Jondahl understreka at det vil kosta noko å få til eit godt, likt tilbod og dra det samla lasset. Han er ikkje «trygg nok» på at dagens tilbod er sikkert nok. Mellom anna vil han vera sikker på at frivillige som er involverte i badetilbodet, har politiattest.

– Det er ikkje draumen til rådmannen å oppretta nye stillingar, men me har ikkje lukkast med å plassera ansvaret på eksisterande stillingar, sa Jondahl.

– Då har me bruka mykje tid på ei av 1.400 stillingar i kommunen, samanfatta Haug etter, medrekna eit gruppemøte, vel ein times debatt om saka.

Les også: