– Det er ikkje tid til å kjeda seg

Det kan føra til ein hektisk kvardag, fortel Samuel Weagbah (19) frå Norheimsund og Magdalena Steine Aamelfot (18) frå Bergen til HF. Dei har båe erfaring med at kvardagen er fylt av skule og jobb.

Weagbah jobbar på Esso-stasjonen i Norheimsund. Der har han arbeidd i omtrent to år. Han fortel at det er vanskeleg for ungdomar å få seg jobb. Som oftast ynskjer arbeidsgjevaren at ein er 18 år eller eldre. Sjølv måtte han som mindreårig leita etter jobb ei stund. Han hadde ein kompis som jobba på «essoen», og dette viste seg å vera løysinga. Weagbah fortel at det er lettare å få jobb når ein har kontaktar på den aktuelle arbeidsplassen.

– Vanskeleg i starten

– Er det krevjande å jobba utanom skulen?

– Det var litt vanskeleg i starten. Det var litt mykje å balansera, med det gjekk fint til slutt, seier Weagbah.

Han har ofte jobba seine kveldar, og det kom av og til i konflikt med skulearbeid og prøvar. Han fortel at det til tider kan oppstå ubehagelege situasjonar med kundar.

– Det er slik det er i sørvisyrket. Du møter så mange forskjellige folk med forskjellige meiningar. Ein veit aldri kva ein kan venta, seier Weagbah.

Trass dette møter han mange hyggjelege kundar i kvardagen. Det ser han på som veldig gjevande.

Weagbah seier det er ein fordel å ha ein jobb å gå til utanom skulen. Det gjer at han får ein kvardag fylt av ulike utfordringar. Dermed har han noko meiningsfullt å gjera.

– Eg har skule og jobb. Det er ikkje tid til å kjeda seg, seier norheimsundungdomen.

Det har vore viktig for Samuel å tena eigne pengar, spesielt med tanke på å spara til førarkort. Dette ynskte han fordi han ville verta meir sjølvstendig. Han seier at alle har potensial til å ha jobb utanfor skulen. Det som er viktig, er å finna ein god balanse mellom skule og arbeid.

– Moro å jobba

Magdalena Steine Aamelfot går på Framnes Kristne Vidaregåande Skule og jobbar på Coop Prix i Norheimsund.

– Korleis er det å jobba som ungdom?

– Det er gøy å jobba og tena pengar. Eg likar veldig godt å snakka med folk, så det å jobba i butikk er midt i blinken, seier ho.

Aamelfot fortel at ho har fått mange positive tilbakemeldingar frå kundar om at det er flott at ungdomar kjem seg ut i arbeid.

– Er det krevjande å jobba utanom skulen?

– Ja, det er litt krevjande å tilpassa trening, skule og lekser. Av og til kan det bli litt mykje.

Aamelfot er ringjevikar. Ho kan takka ja eller nei når dei treng folk i butikken. Det sosiale livet kan vera utfordrande, fortel ho. Eit døme er når mange av venene hennar skal ut og stå på ski. Då har ho eit stort ynske om å vera med, men ofte må ho arbeida.

– Det låser moglegheitene til å vera med på sånne ting. Men elles i vekedagane går det ganske greitt. Eg føler ikkje at eg går glipp av så mykje. Eg nyttar dagane det ikkje skjer så mykje til å vera på jobb.

– Bra å ha på cv-en

– Var det vanskeleg å få jobb?

– Ja. Eg byrja søkja rundt ein månad før eg fylte 18 år. Eg fekk nei av mange, utanom Coop. Eg hadde høyrt at dei trong folk, så då søkte eg der.

– Kvifor ynskte du deg jobb?

– Det er mest for å koma seg ut i arbeidslivet. Det er viktig å byggja opp cv-en, og pengane kjem godt med.

– Har du opplevd ubehagelege situasjonar på jobb?

– Ja, eg trur det var andre eller tredje dagen på jobb. Eg vart kjefta på av ein kunde som ikkje var nøgd, seier bergensaren.

Ho var heilt ny og arbeidet gjekk litt sakte. Aamelfot seier at ein ikkje bør ta slike ubehagelege opplevingar personleg. Det er ikkje alle som er like tolmodige, slår ho fast.

HF gjer merksam på at artikkelforfattarane er mediefagelevar på Framnes Kristne Vidaregåande Skule. Red.