– Det er ikkje nokon dramatikk i dette

Bedehusa er plasserte ved uteområdet til barneskulane i bygdene, og skulane treng både uteareal og byggareal, meiner rådmann Anita Hesthamar i Kvam herad. Rådmannen har såleis bede politikarane om fullmakt til å tinga om kjøp av bedehusa. Formannskapet drøfta saka 7. mars.

– Det er avgrensa kva moglegheiter me har på skuletomtene no, sa rådmannen.

– Vanskeleg sak

Både varaordførar Frode Nygård (Frp) og Gjermund Stuve (Sp) gav uttrykk for at folk var litt overraska over at Øystese bedehus er med i saka. Det har vore litt reaksjonar i Øystese, sa sistnemnde.

– Det har liksom vore avvist til no at det har vore aktuelt. Men om skuleprosjektet har trong for det, må me i alle fall sjå på det, sa Stuve.

Jostein Moldsvor (KrF) tykkjer saka er vanskeleg. Han ser skulane sin trong for større område, men synest samstundes at bedehusa i dag ligg på ein gunstig plass. Med barne- og ungdomsarbeidet som går føre seg i bedehusa, er det bra å vera lokalisert i nærleiken av skulen, meiner han.

Moldsvor støtta framlegget, men sa at han ikkje klarar å sjå føre seg kor bedehusa kan plasserast. Om dei skal flyttast, må den nye plasseringa vera tenleg for dei, meiner han.

– Om ikkje det er aktuelt for nokon av partane å selja, har ein eit nytt utgangspunkt. Det er ikkje nokon dramatikk i dette, sa Nygård.

Eit felleshus?

Geir Madsen (SV) tenkte stort og lufta ein heilt fersk idé. Dette er ei moglegheit til å laga noko heilt nytt i Kvam, meiner han.

– SV ser føre seg eit slags felleshus eller eit religionshus som ein kunne gjort noko spennande med om ein verkeleg tenkte framover og nytt, sa Madsen.

Formannskapet vedtok samrøystes framlegget til rådmannen. Kvam heradsstyre avgjer saka torsdag 14. mars.

Før ein eventuell kjøpsavtale vert signert, lyt saka igjen opp til politisk handsaming.