– Det er ei ære og ikkje eit problem

Onsdag vart det klart at Lubna Jaffery vert ny kultur- og likestillingsminister. Det får konsekvensar for Jondahl, som både står på 2.-plass på lista til Kvam Ap og er konstituert rektor ved Norheimsund skule.

Før Jaffery vart minister, var Jondahl 2. vararepresentant til Stortinget. Forfremjinga til Jaffery gjer at Benjamin Jakobsen, som var 1. vararepresentant, får fast plass på Stortinget, medan Jondahl vert 1. vararepresentant.

– Kor ofte reknar du med å måtta møta på Stortinget?

– Det kan eg ikkje spå noko om, men eg må vera førebudd på å måtta møta på kort varsel, seier Jondahl.

– Vil dette kunna gå ut over engasjementet i lokalpolitikken og jobben som rektor?

– Som vara er eg vara. Eg kan ikkje slutta med jobben sjølv om eg har blitt 1. vararepresentant. No er eg konstituert rektor, og det vil eg vera ved skulestart. Kva som skjer vidare, veit eg ikkje. Sånn reint formelt får ein permisjon når ein er på Stortinget. Slike formelle ting skal eg sjå meir på når det skjer.

– Du fryktar ikkje at du skal få for lite tid til alt?

– Eg skal i alle fall gjera mitt beste. Så vil tida vita kor lenge og kor ofte eg vert vekke frå jobben. Eg kan ikkje verta uroleg på grunn av dette. Eg tykkjer det er ei ære å få høve til å møta på Stortinget. Dette er både kjekt og spanande.

– Kan nye rokeringar gje deg fast plass på Stortinget?

– Det veit eg ikkje, og det ønskjer eg ikkje å spekulera i.