– Det er alltid like kjekt

Tidleg måndag morgon var kunstgrasbanen i Jondal fylt med born og ungdomar. Årsaka var at eit nytt skuleår er i gang. Særleg fekk dei yngste elevane litt ekstra merksemd. Dei vart stilte opp på ei rekkje og fekk høve til å fortelja dei andre elevane kva dei heiter. Dei som tykte det var litt skummelt å snakka framfor så mange, fekk hjelp av rektor Sarah Marie Røstbø til å seia namna.

– Ein overgang

Røstbø fortel til HF at det alltid er kjekt å ønskje ei ny gruppe elevar velkomne til skulebenken.

– Dette er ei økt me går gjennom kvart år på denne tida. Eg tykkjer det er veldig kjekt og spanande å sjå dei fine og spente ansikta som gler seg til å byrja på skulen, fortel ho.

Det viktigaste dei første dagane er at førsteklassingane vert kjende med den nye kvardagen som ventar.

– Dei møter eit nytt bygg, dei møter nye vaksne og dei møter heilt nye rutinar. På skulen har alle ein pult og ein stol, og på skulen har me friminutt og timar. Klokka er mykje viktigare i skulen enn i ein barnehage. Dei er framleis små born, og overgangen skal skje gradvis. Dei skal gje dei tid til å koma inn i dei nye rutinane, seier ho.

– Litt skummelt

Den første skuledagen får foreldra vera med inn i klasserommet, men etter ei lita stund må dei gå og overlata podane til skulen.

Røstbø seier det er stor skilnad på korleis borna reagerer.

– For nokre er den første skuledagen noko nytt, spanande og kjekt. Andre er meir sjenerte og tykkjer det er skummelt når foreldra skal gå. Då kan foreldra få vera litt til. Me prøver tilpassa det slik at det vert ei grei oppleving for alle, seier ho.