– Det beste symposiet så langt

— Det gjekk heilt strålande. Det var svært god stemning, og mange av dei som har vore med før, sa at dette var det beste arrangementet så langt, seier Kristian Flo i programkomiteen i akademiet til HF.

Set fred på dagsordenen

Flo trur at Hardangerakademiet kan påverka verda ved å setja fredssaka på dagsordenen, diskutera, tenkja utanfor boksen og senda ut signal.

Han meiner at «mainstream-mediedekninga» i Vesten i dag er svært einsformig og byr på svart-kvitt-tenking. Det er som å gå attende til andre verdskrig og sjå den eine parten som berre vond og den andre som berre god, meiner Flo.

— Dette er utruleg vanskelege saker som krev doktorgrad i konfliktorientering for å forstå. Når korkje dei som skriv eller dei som les, har det, vert det svært forenkla. Det er den store utfordringa, seier Flo.

Han meiner at store makter og firma står bak og tener gode pengar på krigane. Dei har sine påverkarar på alle politiske nivå, seier han.

Dei store spørsmåla

Flo synest at føredraget «State of the world» av Ingeborg Breines laurdag var eksemplarisk og gav ein fin gjennomgang av det som skjer i verda i dag. Ho fekk med seg dei store verdsproblema, med krig og fred og dei store konfliktane mellom Russland og Ukraina og Nato.

Breines har arbeidd for fredskultur gjennom eit langt liv, mellom anna som leiar av tre forskjellige Unesco-kontor og som «co-president» i «International Peace Bureau».

Sundag heldt mellom andre Ola Tunander føredrag. Han er seniorforskar ved Institutt for fredsforsking i Oslo (Prio) og forfattar. Tittelen på føredraget var «Hvis krig kan starte med løgn, så kan fred begynne med sannhet». Tunander gav ifylgje Flo ei fantastisk førelesing om alle lygnene og påskota som har vorte laga frå Romarriket og fram til i dag.

– Korleis startar ein krig? Det vert laga eitt eller anna påfunn eller angrep som vert påskot. Me må gå inn i historia og sjå på alle desse tilfella – det er heilt forferdeleg. Mektige menneske lagar påskota fordi dei har skjulte agendaer. Så vert det krig. Dette skulle vore pensum i skulen. I staden lærer me kva kongane heitte og kva dei gjorde og ikkje gjorde. Ofte er det rein lygn, heile greia, hevdar Flo.

Meir i kalenderen

Hardangerakademiet har fleire planar. I tillegg til å skipa til leirskule vert det arrangert eit politisk møte med ein dansk førelesar som skal snakka om korleis me møter menneske frå andre kulturar, anten dei kjem frå Ukraina eller Syria. Det vert òg eit kurs i såkalla permakultur, eit designsystem for berekraftige samfunn. Bak dette står Jan Bang og Permakulturforeningen.

I haust kjem dessutan klimaforskar Jostein Bakke frå Jondal for å halda eit helgeseminar. Bakke er professor ved Bjerknessenteret for klimaforsking ved Universitetet i Bergen og ekspert på isbrear.

Han vil mellom anna ta deltakarane med opp på Folgefonna for å sjå på stoda, kan Flo fortelja.