Desse skal skapa gode matopplevingar
17 personar er tilsette i prosjektstillingane som matvert i Kvam.
Det opplyser klinisk ernæringsfysiolog og prosjektleiar Eli Skeie.
I alt 35 personar søkte. Matvertane, som skal halda til på Øysteseheimen og Strandebarm omsorg, er Ellen Marie Handeland, Rahiwa Teklit Ghebredngl, Agnieszka Skowron, Randi Margrethe Nepstad, Andrea Landro, Runa Stave, Duangrat Khrutram, Veslemøy Myklebust, Linnea Rykken, Viktoria Wedaa, Sondre Haugsland Ur, Guro Honningsvåg Vik, Vanja Alvsåker, Synva Holt, Veslemøy Knutsen Botnen, Alida Skår Måge og Kristina Ljones Gravdal.
Matvertane starta opp denne veka. 2. januar hadde dei ein felles opplæringsdag der dei vart underviste i mellom anna mat, måltid og ernæring for eldre, kommunikasjon og rutinar for handtering av mat. Dei nytilsette vitja institusjonane som er med i prosjektet. Der fekk dei ein praktisk gjennomgang av relevante oppgåver, fortel Skeie.
Ifylgje prosjektleiaren er nokre av dei tilsette unge arbeidstakarar som kombinerer jobben med skule.
Hovudoppgåva deira vert å syta for at bebuarane får hyggjelege, smakfulle og næringsrike måltid som er tilpassa kvar enkelt. Dessutan vonar Skeie at tida som vert frigjord for pleiepersonell, kan gje dei tilsette betre tid til oppgåver som i større grad krev deira kompetanse.
