Desse har fått koronastøtte
24 verksemder i Kvam har fått kompensasjon for tapte inntekter.
Sidan 18. april har verksemder som har opplevd stort bortfall av inntekter som følge av virusutbrotet, kunna søka om kontantstøtte. Skatteetaten står for tildelinga. Målet er å unngå konkursar og at næringslivet kjem seg raskare tilbake til normalen når krisa er over, skriv Skatteetaten på heimesida si.
Støtta skal hjelpa med faste utgifter som husleige, straum- eller rentekostnader. For å få pengar, må verksemda ha eit omsetningsfall på minst 20 prosent i mars og minst 30 prosent i april og mai. Minstegrensa for å få kompensasjon er på 5.000 kroner.
I Kvam har 24 verksemder fått tildelt til saman 459.441 kroner. Inntektstapet i verksemdene er på til saman 3.134.642 kroner samanlikna med same periode i fjor.
AS Kvam Fjellheisar har fått den største tildelinga. Ho er på 92.135 kroner, Verksemda melder om ein omsetnad på 378.668 kroner i den aktuelle perioden, samanlikna med 1.093.928 på same tid i fjor. Det er ein skilnad på 715.260 kroner. Verksemda har faste, uunngåelege kostnader på 173.062 kroner.
Tildelinga på 92.135 kroner kan dekka 53,2 prosent av dei faste kostnadene, og utgjer 12,9 prosent av tapet i omsetnad samanlikna med fjoråret.
I Jondal har Hardanger Fjord AS fått tildelt 5.615 kroner. Verksemda melder om omsetnad på 41.000 kroner i 2019 og faste kostnader på 17.019.
