Desse fekk snøskuterløyve

I ei heradsstyresak i 2008 vart det vedteke 13 soner med til saman 35 løyve for leigekøyring med snøskuter. Kvart løyve gjev rett til å nytta to skuterar. Fristen for å søkja om løyve for dei neste fire åra var 1. november i fjor.

Kvam herad fekk ikkje søknader i sone 1, 2, 5 og 12, medan det var fleire søknader enn tilgjengelege løyve i sone 3 og 13. Det går fram av saksutgreiinga.

Ei oversikt over sonene kan du sjå i tabellen lenger nede i saka.

Heradet legg vekt på om løyvehavarane er busette i heradet. Dei som har hatt løyve med næringsinntekt før, er høgare prioriterte enn nye søkjarar. Køyringa skal vera ein del av næringsinntekta til verksemda som har løyvet, heiter det i vedtaket. Ordninga med at næringsdrivande handverkarar kan søkja om løyve, vert vidareført.

Ynskte fleire løyve

Eit hjelpekorps søkte om fleire løyve i sone 9, 10 og 11, men det finst ikkje fleire tilgjengelege løyve i desse sonene. Øystese Røde Kors har klaga på vedtaket. I klagen skriv leiar Andreas Jacobsen at laget før har hatt fire løyve i sone 9, 10 og 11, men berre har fått eitt i det siste vedtaket. Reduksjonen vil gjera at laget mistar inntekt, fordi hovudinntekta er varetransport og sal av ved. Nedgangen vil dessutan svekkja beredskapen, skriv han.

– Me håpar at Kvam herad kan gje oss tre løyve, slik det vart søkt om, skriv Jacobsen i klagen.

I vedtaket står det at hjelpekorpset har tre skuterar, og at laget ynskjer ein fylgjeskuter for å vareta tryggleiken til sjåførane. Laget kan nytta dei tre skuterane som dei ynskjer, men berre to kan vera operative for leigekøyring samstundes i éi sone, heiter det i vedtaket.

Vilkår må fylgjast

Ervervsløyva for motorisert ferdsle i utmark gjeld på snødekt mark i vintersesongane 2025–2028. Leigekøyingsløyva er gjevne med heimel i forskrift om motorferdsle i utmark og delegasjonsreglementet til Kvam herad. Registreringsnummer skal meldast til heradet på førehand, og skuteren skal merkjast med oblat frå heradet. I tillegg må reglane i vilkår for bruk av snøskuter i utmark frå hovudutval for kultur fylgjast.

Fylgjande vilkår gjeld: Det er forbode å køyra utanfor oppgjeve område eller med andre føremål, mellom klokka 23 og 07 og på sundagar og heilagdagar mellom klokka 10 og 14. Løyve krevst for å køyra på privat grunn. Berre løyvehavar kan nytta snøskuteren, og vedkomande må ha med og kunna visa fram løyve.

Oversynet over søkjarar som har fått løyve, ser du her:

Ein privatperson, tre verksemder og to hjelpekorps i Raudekrossen med bustadadresse utanfor heradet søkte om løyve. Desse har hatt løyve før og er etablerte med næringsinntekt på leigekøyring. Dei vil difor framleis vera kvalifiserte til å søkja, heiter det i vedtaket.