– Desember var ekstremt travel

Då hadde verksemda 24 nyregistreringar av personbil, opplyser ansvarleg for bilsal i verksemda, Christoffer Gjerde.

Grunnen til rekorden er at elbilar fekk ein moms- og vektavgiftsauke frå nyttår, og kjøparane kunne spara 20.000–65.000 kroner på å registrera bilen før årsskiftet. Gjennomsnittssalet til bilsenteret er på 4–6 bilar i månaden.

65 prosent av dei nye personbilane som senteret selde i fjor, var heilelektriske. Ingen nye personbilar var reine fossilbilar.

ØMV Bilsenter leverte 58 nye personbilar og 11 nye varebilar i fjor, i ein marknad på om lag 200 nybilregistreringar i Kvam. Av personbilar selde Gjerde flest Suzuki. Innan varebilar var Ford mest populær.

Forhandlaren selde 74 bruktbilar i 2022.

Gjekk mot straumen

Elektriske bilar dominerte nybilsalet i 2022.

– Men hybride bilar har overraskande høgt sal i Kvam, i ein norsk marknad der heilelektriske bilar dominerer, seier Gjerde.

Han er nøgd med at ØMV Bilsenter såleis har gått litt mot straumen.

Suzuki har ikkje heilelektriske personbilar å tilby enno. Merket hadde likevel ein andel på vel 12 prosent i personbilmarknaden. Suzuki har eit breitt spekter av hybridmodellar, fortel Gjerde.

På ei tilstelling med suzukiimportør RSA nyleg fekk ØMV Bilsenter ei utmerking på grunn av høg marknadsandel i sitt område. 10 av dei kring 70 suzukiforhandlarane i landet vart påskjøna med ein plakett under eit arrangement på Gardermoen tysdag 17. januar. Det stadfester Lars Havre, merkesjef i Suzuki Norge.

Forhandlaren byrja med bilmerket BYD i fjor, og fekk selt 13 bilar. BYD produserer berre heilelektriske bilar.

Selde 55 toyotaer

Desember var ein travel månad også for Toyota Norheimsund AS, med 14 nyregistrerte bilar. Av desse var 4 varebilar.

Salskonsulent Kristian Børven fortel at bilforhandlaren i Steinsdalen totalt selde 32 Toyota-personbilar og 23 Toyota-varebilar i 2022. Verksemda sel fyrst og fremst nye bilar frå Toyota. Det nye i fjor var at forhandlaren fekk inn elbilar av merket Toyota BZ. Det er den fyrste heilelektriske personbilen verksemda sel.

Størsteparten av nybilane verksemda selde i fjor, var plug-in-hybrid eller hybrid. Verksemda har dessutan levert ein del heilelektriske varebilar. Elles har verksemda selt mange lite brukte hybridbilar. Ho selde også mange varebilar i fjor.

– Det var eit godt år, konstaterer Børven.

170 totalt

Medrekna bruktbilar selde Toyota Norheimsund kring 170 bilar i fjor. Det er det same talet som i 2020.

Ein del av bilane som vart selde, kunne ikkje leverast før i år. I ein periode i fjor var det lang leveringstid, men no har det byrja løysa seg, fortel Børven.

Toyota Norheimsund samarbeider med Jæger Automobil AS i Bergen og forhandlar merket Lexus.

Tesla har ikkje forhandlar i Kvam, men når kjøparar har adresse i Kvam, vert bilen registrert her i statistikken til Opplysningsrådet for veitrafikken (OFV).

Toyota størst i nybilmarknaden

Toyota er det bilmerket flest kvemmingar føretrekkjer, med 32 selde nye personbilar i 2022.

Det er tilfellet trass ein nedgang på 29 prosent frå 45 bilar i 2021. Toyota gjekk frå ein andel på 27 prosent i 2021 til 16 prosent i 2022.

Den amerikanske nykomaren Tesla kjem like bak, med 30 selde heilelektriske bilar og ein andel på 15 prosent i 2022 mot 9 prosent i 2021.

Japanske Suzuki er på 3.-plass på salsstatistikken i Kvam, og har ein andel på 12 prosent med 23 selde nybilar i 2022.