Den nye skulen er i rute

Når ein går inn inngangsdøra til det som skal verta Kvam vidaregåande skule, vert ein møtt av ei høg, brei trapp. Her kan ein slengja seg ned for å ta ein prat med venegjengen. Eventuelt kan trappa nyttast som amfi av publikum under arrangement. Dei store vindauga slepper lys inn i lokalet.

Til venstre for inngangsdøra står endå ei stor tretrapp. Trappa er bygd etter inspirasjon frå spiraltrappa i det gamle bygget, fortel prosjektleiar Gunnar Hemre Ringheim i Vestland fylkeskommune. Trappa snirklar seg rundt dei to heisane som skal gå opp og ned i midten av henne.

Mellom dei to trappene finn ein inngangen til det som skal verta kinosal. Kinoen skal ha eit stort lerret og eit amfi med stolar som kan skyvast vekk, om ein treng større golvplass.

Denne onsdagen rommar kinoen bord laga av gipsplater, dekte med bagettar, kaker, brus og kaffi. Gul- og oransjekledde arbeidarar med hjelm og vernebriller stiller seg langs alle veggane. På det meste har 120 arbeidarar vore i sving samstundes, seier anleggsleiar Murtaza Kazemi i Veidekke Entreprenør AS. Til vanleg er det om lag 80, men nokre dagar over 90 arbeidarar i anleggsområdet.

Då byggjetrinn éin var under tak i mars, vart det feira med kranselag. Heile det fyrste byggjetrinnet er ferdig. No er fyrste steg i byggjetrinn to fullført. Ringheim sa at det var overraskande mange som dukka opp.

– Det er ein skikk at byggherren har kranselag når sperrene er på plass, men det var ikkje så lett å definera det tidspunktet i dette prosjektet. Me bestemte at når glastaket var oppe, var det eit påskot for å halda fest, sa Ringheim.

– Fagmessig godt arbeid

Kazemi sa at det tette taket er ei viktig hending for alle på arbeidsplassen. Han fortalde at vegen så langt har vore krevjande, og at det har vore store utfordringar, spesielt i byggjetrinn éin.

– No har me avtala med Veidekke at det skal verta ein mildare og enklare vinter. Murtaza har førebudd arbeidet og me trur alt skal verta lettare, sa Ringheim, og hausta latter frå tilhøyrarane.

Kazemi takka arbeidarane for innsatsen og skrytte spesielt over jobben som er gjord i samband med tryggleik på arbeidsplassen.

– Innsatsen dykkar er avgjerande for at me har kome så langt. Me har støytt på mange farar, men har møtt dei på ein ansvarleg måte. Eg er stolt av å kunne seia at me så langt ikkje har hatt skadar som har ført til fråvær. Tryggleik er ikkje noko konstant, men det krev at me er årvakne i kvar einaste vesle handling, sa Kazemi.

Også prosjektleiaren nytta høvet til å takka arbeidarane.

– Eg ser at det er gjort fagmessig godt arbeid heilt frå den nedste smågatesteinen i Grovagjelet til skiferen på toppen av gamlebygget, sa Ringheim.

Han sa at arbeidet i det andre byggjetrinnet er kome godt i gang.

– Om de ser dykk rundt om både ute og inne, så ligg me fantastisk godt an. Av og til klyp eg meg i armen og lurar på kva de skal gjera i 2025, når de er kome så langt allereie, sa Ringheim.

Snart klart

Yrkesfagelevane frå avdelinga i Steinsdalen vert etter nyttår dei fyrste til å ta i bruk sin del av skulen. Den delen av skulebygget var del av det fyrste byggjetrinnet, og er allereie overlevert Kvam herad. I fyrste etasje står verkstadane klare. Dei er nesten tomme, og ventar berre på at instrument og verktøy skal verta installerte.

Dei gul- og brunkledde trappene fører til klasseromma i andre etasje. Jordtonar går att i alle romma i bygningen. Ein del av rekkverket har ein mørkebrun trefarge, medan andre delar heller meir mot gull. Fleire veggar er måla i ein mørk, plommelilla farge, og nokre stader er det innslag av grønt. Det er nytta spileveggar som lyddempar i fleire rom. Vaskar med automatiske vasskranar slår seg på når dei vert passerte, men det er ikkje kome tørkepapir i dispenserane endå. Når møblar og utstyr er på plass, er denne delen av bygget klar til bruk.

Det nye bygget gjev elevar og tilsette lokale som er tilrettelagde etter dagens standard.

– Om ein tenkjer på kor gamle bygga dei nyttar i dag er, vil det utan tvil vera ei stor oppgradering for alle på skulen, seier Ringheim.

– Må halda orden

Prosjektleiaren seier det er viktig både for han, Kazemi og prosjektleiar i Veidekke, Kjartan Einarsson, å vera til stades i anleggsområdet for å delta og følgja opp arbeidet. Kazemi seier han er i området frå klokka 7 til 19 kvar dag.

Sjølv om skulen er ein byggjeplass, er alle golva ryddige. Det ligg ingenting på golvet. Kvar veke vert det gjennomført vernerundar, og enkelte arbeidarar er sette til å jobba med tryggleiken til arbeidarane på fulltid. Det er tøft å fylgja opp i eit så stort prosjekt, ifylgje anleggsleiaren.

– Me har jobba mykje med å få alle til å rydda etter seg. Dersom det vert oppdaga avvik, vert arbeidarane pålagde å ordna opp med ein gong, fortel Kazemi.

Han er oppteken av dei små detaljane. Til dømes får ikkje byggjestøvet fyka fritt. Dersom ventilasjonsrøyr er opne, må dei dekkjast til for å hindra at støvet vert liggjande inni dei og drege med når ventilasjonen blir slått på. Anleggsleiaren ynskjer å levera bygget frå seg med så lite byggjestøv som mogleg.

Gamalt bygg har gjeve hovudbry

Sjølv om dei fleste store utfordringane kom i det fyrste byggjetrinnet, har arbeidarane møtt på krevjande oppgåver.

– Viss ikkje det hadde vore utfordringar, hadde ikkje Gunnar og eg hatt jobb, seier Kazemi.

Det gamle bygget har gjeve Kazemi hovudbry fleire gonger.

– Det har vore mykje vanskelegare og meir komplisert enn eg trudde. Sjølv om det ser ut som små endringar, har det vore vrient å gjennomføra, seier han.

Vindauga i det gamle bygget er bytte med nye. Vindauga i tårnet, skal restaurerast. Den gamle og den nye bygningen er knytte saman fleire stadar, slik at ein ikkje skal tenkja over det når ein går mellom avdelingane, seier Ringheim.

Svingtrappa ved hovudinngangen mot sentrum har gjeve andre utfordringar. Trappa har ei spesiell utforming, så det har vore utfordrande å sørgja for at ho er solid nok og toler bruken, fortel Kazemi.

Både i andre og tredje etasje er det hjørnerom med utsikt over sentrum og fjorden. Ifylgje Ringheim har rektor Arild Matland sagt at han ikkje vil flotta seg med hjørnekontor, og difor skal romma med den gode utsikta verta møterom til glede for fleire.

– Eg synest dette rommet er så flott at til og med eg som vossing må innrømma at det er fint i Norheimsund, seier Ringheim.

Sjå bilete av skulen:

– Eit godt val

Det siste som skal gjerast ferdig er området utanfor hovudinngangen mot Grovagjelet. Mesteparten av arbeidet i Grovagjelet er allereie ferdig. Sjølv om det ikkje var tidfesta, har Kazemi prioritert prosjektet. Det var ikkje aktuelt å stengja vegen endå ein gong seinare, forklarer han.

– Me måtte ikkje gjera noko med vegen før til neste år, men har gjort det for at trafikksituasjonen skal verta lettare når skulen skal brukast, seier Kazemi.

– Det var eit godt val. Me er svært nøgde no, og det trur eg folk i Norheimsund òg er, seier Ringheim.

Når skulen står klar skal det ikkje vera gjennomgangstrafikk mellom den nye skulen og barneskulen, ifylgje Ringheim. Det meste av buss- og biltrafikken skal koma frå vegen mot Spar. Bilane skal køyra opp ved bedehuset, fylgja skulebygget eit stykke mot sentrum, rundt ei rundkøyring og så køyra attende mot Spar igjen. I midten av denne sløyfa skal det bli parkeringsplass, fortel Ringheim.

– Må jordskjelv til

Utsida av inngangspartiet mot Grovagjelet skal få ulike nivå, små murar, sitjeplassar, planter og lys, men vert ikkje opna for gåande før all bygging er avslutta.

1. oktober neste år skal heile prosjektet vera ferdig. Då skal skulen husa 310 elevar, 60 tilsette, bibliotek, administrasjon for kulturskulen, kino og vaksenopplæring. Ringheim vonar bygget skal verta bra for alle partar når det står klart. Han seier at prosjektet har vore eit samspel der både rektor og representantar for alle fagretningar har vore med i prosessen, slik at dei veit kva rom dei får.

– Bygget vert kjempebra, seier prosjektleiaren.

At alt arbeidet er ferdig innan fristen, kjenner både Kazemi og Ringheim seg trygge på, med mindre det skjer noko heilt ekstraordinært.

– Det må vera eit jordskjelv eller liknande, om me ikkje skal klara det, seier Kazemi.

– Ja, det er nesten på det nivået, seier Ringheim.

Sjå korleis skulen ser ut her: