Den nye frivilligsjefen

Dimed tek sjukepleiaren steget over frå kommunal til frivillig sektor. Ho har nemleg arbeidd i Ullensvang kommune, fyrst som sjukepleiar i heimetenesta og på sjukeheimen, og sidan innan rus og psykisk helse. Frå den stillinga har ho fått permisjon.

Som hand i hanske

Molven er i ferd med å ta ein mastergrad. Masteroppgåva handlar om livskvalitet, sosial støtte og meiningsfylte aktivitetar.

– Det er veldig spanande. Då mogelegheita kom og det var ledig jobb her, var det eigentleg draumejobben min. Eg kan kombinera erfaring, lokalkunnskap og fagleg kompetanse, og jobba målretta med førebygging, folkehelse og levande bygder, seier den nye leiaren.

– Kva kan du ta med deg frå sjukepleia inn i stillinga?

– Eg har jobba med menneske sidan eg var 15, og vore avhengig av å samarbeida tverrfagleg og med pårørande. Det kan eg ta med meg inn i ein jobb der rolla mi er å vera eit bindeledd mellom kommunen, frivillige, lag og organisasjonar. Og så har eg god kjennskap til kommunen. Det er ein fordel.

Var den føretrekte

Molven var ein av åtte søkjarar, faktisk den einaste frå Jondal, og var den søkjaren styret føretrekte. Sentralen har vore i drift i ti år og har hatt tre daglege leiarar før Molven. Styret veit såleis etter kvart kva profil leiaren bør ha, påpeikar styreleiar Olav-Magnus Hammer.

– Christine kjenner folk og kan knyta kontakt med dei frivillige, og kan få dei frivillige kreftene fram i lyset, seier han.

Molven har ikkje planar om å revolusjonera drifta og tiltaka med det fyrste, men vil få høve til å utarbeida eit nytt årshjul.

– På lengre sikt vil det nok koma nokre nye tiltak, men fyrst må eg verta godt kjend med frivilliggruppa og aktivitetane. Så er det viktig å prøva å rekruttera nye frivillige og gjera det triveleg for dei som er frivillige, slik at dei har lyst til å halda fram, seier Molven.

Éin ting er ho sikker på: Ho har lyst til å vidareføra mat- og kultursamlingane for eldre, som har vore ein stor suksess. Korleis det kan gjerast, må sentralen sjå nærare på.

– Tiltaket har inkludert heile gamle Jondal kommune og har betydd mykje for mange, seier ho.

– Dei trengst

Hammer legg ikkje skjul på at det trengst rekruttering i gruppa av frivillige. Yngre pensjonistar er hjarteleg velkomne, fortel han.

– Lokalsamfunnet treng dei frivillige. Under koronaen gjekk det ei veke eller to, så var dei frivillige i gang. Det er ein samfunnstryggleik og beredskap i funksjonane til frivilligsentralane, seier styreleiaren.

Han påpeikar at Molven vil få oppgåver i kontakten med nettverket mellom frivilligsentralane. Dessutan vert ho sentral, saman med leiarane for dei to frivilligsentralane i Odda og Kinsarvik, når ein frivilligpolitikk for Ullensvang skal formast.

– Ei fin gruppe

Avtroppande dagleg leiar, Liv Bente Steiro, seier det vert vemodig å slutta, men trur frivilligsentralen har fått inn den rette etterfylgjaren. Dessutan har Jondal ei fin gruppe med engasjerte frivillige, ikkje minst knytt til Sentralen. Men folk vert eldre, og ikkje alle pensjonistar er like villige til å binda seg lenger, påpeikar ho.

– Det har vore ein veldig kjekk arbeidsplass, seier Steiro, som sjølv ikkje veit kva ho skal finna på.

– Men det vert nok noko kreativt, seier ho.

Formelt overtek Molven stillinga 1. juni, men ho er allereie i gang. Det vert ein glidande overgang frå den gamle til den nye sjefen.