Den eldste musikklinja i Noreg får halde fram
Onsdag kom eit endeleg vedtak frå fylkespolitikarane i Vestland fylkeskommune om at tilbodet av kunstfaga på Voss gymnas held fram som før. Det gjorde at jubelen stod i taket på gymnaset.
– Vi er så letta! Eg var nesten på gråten da eg fekk vite dette. Nedleggingsfaren har hange over skolen tidlegare, men dette var mykje meir alvorleg, seier lektor og pianist ved skolen, Frode Skag Storheim, til Bergens Tidende.
Storheim har stått i bresjen i aksjonen for å bevare kunstfaga på gymnaset, etter at fylkesdirektør i Vestland fylkeskommune, Bjørn Lyngdal, i haust la fram eit forslag om å legge ned blant anna kunstlinjene ved Voss gymnas. Målet var å spare pengar etter at Hordaland og Sogn og Fjordane vart slegne saman til Vestland fylke.
Voss gymnas er over hundre år gammalt, og fekk den første musikklinja i Noreg i 1968.
Avdelingsleiar for kunstlinjene på gymnaset, Knut Brunvoll, fortel at det har vore ei nervepirrande veke, og at han er ekstra glad for at fylkeskommunen verdset regionen og viser at dei har litt perspektiv.
Pianist Leif Ove Andsnes er ein av dei som har engasjert seg i saka. Han har sagt at det hadde vore katastrofalt å miste musikkutdanninga på Voss.
