– Den beste løysinga for alle

Det meiner foreldrearbeidsutvalet (FAU) ved Strandebarm skule, som har sendt høyringsinnspel i saka om nedlegging av skulen i Tørvikbygd.

Til liks med dei tilsette framhevar foreldra at skulen har god plass og på fleire måtar vil verta styrkt av å ha fleire elevar. Til dømes vil det truleg verta færre slegne saman klassar.

FAU understrekar trongen for å sikra mellom anna ein god overgang for elevane, trygg skuleskyss, eigen skuleskyss for skulefritidsordninga, samarbeid med barnehagen i Tørvikbygd, betre utemiljø, betre bemanning, betre skuleveg og busstopp mellom Tørvikbygd og Strandebarm og betre busstilbod på kveldstid.

Elevane i Tørvikbygd har allereie bading i bassenget i Strandebarm. Kanskje kan desse besøka utvidast før flyttinga for å leggja til rette for at gjestene kan verta kjende med både skulen og elevane, ifylgje FAU.

Særleg mellomtrinnet i Strandebarm har i dag eit dårleg eigna uteområde, med nokre få disser og lite anna. Dessutan er kunstgrasbanen både dårleg drenert og lyslaus, og difor ikkje brukande i vinterhalvåret, påpeikar foreldra.

FAU gler seg særleg over at påfyll av elevar kan sikra ungdomstrinnet i Strandebarm, som utvalet elles ottast for framtida til. Om ungdomsskulen skulle verta nedlagd, må elevane på Mundheim måtta køyra buss i kring 150 minutt til og frå ungdomsskulen i Øystese. Det vil ikkje vera akseptabelt, meiner foreldra.

– Då er det eit betre alternativ å styrkja elevgrunnlaget ved skulen og sikra gode læringsforhold for alle i kommunen, også i framtida, skriv leiar Kristine Håland på vegner av FAU.