Delte ut straumstønad til grendehus
Hardanger Energi AS delte ut straumstøtte til 21 grendehus og ungdomshus like før jul.
Marknadssjef Per Sigurd Hegerland i Hardanger Energi seier til Hardanger Folkeblad at grendehusa som er opne for alle i bygdene, kjem svært dårleg ut av dei ulike stønadsordningane.
– Ved å støtta grendehus som er drifta av frivillige lag og organisasjonar, treffer me på sett og vis noko som er felles for lokale innbyggjarar, seier Hegerland til oddabladet.
Dei som har fått utbetalt stønad, er kundar hjå energiselskapet og ligg i tidlegare Ullensvang herad, Jondal, Eidfjord, Ulvik og Granvin. Ingen trong å søkja for å koma inn under ordninga, som totalt deler ut 407.000 kroner.
Verksemda har lagt årleg forbruk til grunn for stønaden, og har multiplisert det med éi krone.
Herand Grannahus fekk 16.000 kroner, Herand Bygdelag 54.000 kroner, Kysnesstrand Ungdomslag 24.000 kroner og Jondal Ungdomslag 52.000 kroner.
