Deler ut 100 millionar kroner
Sparebankstiftelsen Sparebanken Vest opnar lommeboka igjen.
Stiftinga løyver ein ekstraordinær pott på 100 millionar kroner til tiltak som er med på å bygga opp att organisasjonar og frivillig arbeid på Vestlandet, skriv stiftinga i ei pressemelding.
Det vil snart verta mogleg å søka om pengar frå potten. Kriteria vert kunngjorde seinare.
– Etter eit uroleg og uføreseieleg år er det mange lag og organisasjonar som blør. Me vil gjera det me kan for at dei skal komma raskt tilbake til slik det var før pandemien og sikra kontinuitet, seier styreleiar Hallgeir Isdahl.
– Det er viktig for oss å sikra at lag, organisasjonar og kulturaktørar kan halda fram det viktige arbeidet sitt også etter denne krisa, seier Bjørn Thømt, dagleg leiar i Sparebankstiftinga.
Samstundes er det framleis 40 millionar kroner att i koronafondet til stiftinga. Så langt er vel 60 millionar kroner delte ut til nesten 1.200 frivillige organisasjonar som har økonomiske utfordringar som følge av pandemien.
