– Del råd i to!
Eldre og menneske med funksjonsnedsetjing i Kvam vert truleg representerte av kvart sitt råd.
Dimed ser det ut til at pensjonistlaga gjennomslag for ynsket sitt om å splitta rådet for menneske med nedsett funksjonevne og eldre i to frå og med komande valperiode.
Dei to råda vart slegne saman i 2019, som fylgje av det var vanskeleg å få nok representantar til to år. Ein kan slå dei saman i tilfelle der lokale forhold tilseier at det er naudsynt. Utgangspunktet er at det skal vera to separate råd.
No er situasjonen ein annan. Før valperioden har det vore arbeidd godt med å rekruttera representantar til dei to råda. Framlegget går ut på at råda skal ha fem faste representantar og fire varalemer. Formannskapet tilrår at ein av representantane skal veljast mellom lemene i heradsstyret. Dei andre vert tilrådde av pensjonistlaga og medlemsorganisasjonane.
Eit framlegg om retningsliner for råda har vore på høyring. Det kom ikkje store protestar mot den nye ordninga. Både rådmannen og formannskapet tilrår ordninga. Heradsstyret avgjer saka tysdag 3. oktober.
– Det er bra at representantane får kvar sine utval, sa Siv Håbrekke (Sp) då formannskapet drøfta saka 27. september.
Representantane til dei nye råda skal eventuelt veljast i det konstituerande møtet i det nye heradsstyret 18. oktober.
